ఐపీఎల్లో మరో ఆసక్తికర పోరుకు రంగం సిద్ధమైంది. మంగళవారం దిల్లీ క్యాపిటల్స్, ముంబయి ఇండియన్స్ మధ్య మ్యాచ్ జరగనుంది. ఇప్పటికే చెరో మూడు మ్యాచ్లు ఆడిన ఇరుజట్లు.. రెండు మ్యాచ్ల్లో నెగ్గాయి. ఈ మ్యాచ్లో గెలిచి పాయింట్ల పట్టికలో మెరుగయ్యేందుకు టీమ్లు వ్యూహాలను రచిస్తున్నాయి.
బౌలింగ్ దళమే జట్టు బలం!
ముంబయి ఇండియన్స్ ఆడిన గత రెండు మ్యాచ్ల్లోనూ తక్కువ స్కోరును డిఫెండ్ చేసుకుంటూ వరుసగా రెండు విజయాలను నమోదు చేసింది. ఈ జట్టు విజయంలో బౌలర్లదే కీలకపాత్ర అని చెప్పుకోవాలి. ఇదే బౌలింగ్ బలంతో హ్యాట్రిక్ గెలుపును దక్కించుకునేందుకు సంసిద్ధమవుతోంది రోహిత్ సేన.
ఈ జట్టులో టాప్ ఆర్డర్ బ్యాట్స్మన్ రాణిస్తున్నా.. మిడిల్ ఆర్డర్లోని బ్యాట్స్మెన్ తడబాటుకు గురవుతున్నారు. దీని వల్ల జట్టు తక్కువ స్కోరుకే పరిమితమయ్యి.. ఆ తర్వాత ప్రత్యర్థిని కట్టడి చేయడంలో బౌలర్లపై ఎక్కువ భారం పడుతుంది. అయితే ఈ సారి మిడిల్ ఆర్డర్లో స్వల్ప మార్పులు జరిగే అవకాశం ఉంది. టాప్ ఆర్డర్ విఫలమైనా.. మిడిల్ ఆర్డర్ నిలకడగా రాణించి జట్టుకు ఎక్కువ స్కోరు రాబడితే విజయం ఖాయమే!
ధావన్ మంత్రంతో..
ఓపెనర్ శిఖర్ ధావన్.. దిల్లీ క్యాపిటల్స్ జట్టుకు విలువైన ఆటగాడు. ఆదివారం పంజాబ్తో జరిగిన మ్యాచ్లో నిలకడగా బ్యాటింగ్ చేసి 92 పరుగులు నమోదు చేశాడు. ఈ స్కోరుతో దిల్లీ క్యాపిటల్స్ జట్టు విజయం సాధించడంలో అతడి ఇన్నింగ్స్ కీలకపాత్ర పోషించింది. టోర్నీలో ఇప్పటివరకు అత్యధిక పరుగులు చేసిన బ్యాట్స్మన్గా 186 పరుగులతో శిఖర్ ధావన్ ఆరెంజ్ క్యాప్ రేసులో ముందున్నాడు.
శిఖర్ ధావన్, పృథ్వీషాతో దిల్లీ క్యాపిటల్స్ ఓపెనింగ్ బ్యాటింగ్ అద్భుతమైన ఫామ్లో ఉంది. కానీ, మిడిల్ ఆర్డర్లోని స్టీవ్ స్మిత్ ఆదివారం జరిగిన మ్యాచ్లో మెచ్చుకోదగ్గ ప్రదర్శన చేయలేదు. కానీ, ముంబయి లాంటి జట్టుపై ఆధిక స్కోరు నమోదు చేసినట్టయితే.. రోహిత్సేనను కట్టడి చేయడానికి దిల్లీ బౌలింగ్ దళానికి పెద్దగా కష్టపడాల్సిన అవసరం లేదు. అయితే ఈసారి అనుభవజ్ఞులైన అమిత్ మిశ్రా, ప్రవీణ్ దూబేతో పాటు షామ్స్ ములానిలను జట్టులోకి తీసుకునే అవకాశం ఉంది.
జట్లు (అంచనా)..
ముంబయి ఇండియన్స్: రోహిత్ శర్మ (కెప్టెన్), డికాక్, సూర్యకుమార్ యాదవ్, ఇషాన్ కిషన్, హార్దిక్ పాండ్యా, కృనాల్ పాండ్యా, కీరన్ పొలార్డ్, మార్కో జాన్సెన్, జస్ప్రీత్ బుమ్రా, ట్రెంట్ బౌల్ట్, రాహుల్ చాహర్.
దిల్లీ క్యాపిటల్స్: రిషబ్ పంత్ (కెప్టెన్), శిఖర్ ధావన్, పృథ్వీషా, మార్కస్ స్టోయినిస్, లలిత్ యాదవ్, క్రిస్ వోక్స్, రవిచంద్రన్ అశ్విన్, కగిసో రబాడా, ఆవేశ్ ఖాన్, స్టీవ్ స్మిత్, లక్మన్ మెరివాలా.
ఇదీ చూడండి: ఆ క్రికెటర్లతో పాటు వార్నర్, విలియమ్సన్ ఉపవాసం
