దిల్లీ క్యాపిటల్స్తో జరుగుతోన్న ఐపీఎల్ మ్యాచ్లో ముంబయి ఇండియన్స్ బ్యాటింగ్లో తడబడింది. రోహిత్ శర్మ కెప్టెన్ ఇన్నింగ్స్తో మంచి ఆరంభం లభించినా.. వరుస వికెట్లు పడటం వల్ల తక్కువ స్కోర్కే పరిమితమైంది. దిల్లీ బౌలర్లు కట్టుదిట్టంగా బంతులేసి మెప్పించారు.
టాస్ గెలిచి మొదట బ్యాటింగ్కు దిగిన ముంబయికి ఆదిలోనే ఎదురుదెబ్బ తగిలింది. ఓపెనర్ డికాక్ (1) తొందరగానే పెవిలియన్ చేరాడు. తర్వాత సూర్యకుమార్తో కలిసి రోహిత్ దూకుడుగా ఆడాడు. వీరిద్దరూ రెండో వికెట్కు 58 పరుగులు జోడించారు. ఫలితంగా తొలి పవర్ప్లేలో 55 పరుగులు సాధించి పటిష్ఠ స్థితిలో కనిపించింది ముంబయి. కానీ ఆ సంతోషం ఏమాత్రం నిలవలేదు.
7వ ఓవర్లో సూర్యకుమార్ (24) ఆవేశ్ ఖాన్ బౌలింగ్లో కీపర్కు క్యాచ్ ఇచ్చి ఔటయ్యాడు. అనంతరం తొమ్మిదో ఓవర్లో ధాటిగా ఆడబోయి అమిత్ మిశ్రా బౌలింగ్లో పెవిలియన్ చేరాడు కెప్టెన్ రోహిత్. అదే ఓవర్లో హార్దిక్ పాండ్యా (0) డకౌట్గా వెనుదిరిగాడు. తర్వాత కృనాల్ (1), పొలార్డ్ (2) తీవ్రంగా నిరాశపర్చారు. అయితే ఈ వికెట్ల పతనానికి బ్రేక్ వేస్తూ ఇషాన్ కిషన్ (26), జయంత్ యాదవ్ (23) కాసేపు పోరాడారు. ఫలితంగా నిర్ణీత ఓవర్లలో 9 వికెట్ల నష్టానికి 137 పరుగులు చేసింది రోహిత్సేన.
దిల్లీ బౌలర్లలో అమిత్ మిశ్రా 4 వికెట్లతో సత్తాచాటగా ఆవేశ్ ఖాన్ 2, రబాడ, లలిత్ యాదవ్, స్టోయినిస్ చెరో వికెట్ దక్కించుకున్నారు.
