ముంబయి జట్టుతో జరిగిన మ్యాచ్లో ఘోరంగా ఓటమిపాలైంది చెన్నై సూపర్ కింగ్స్. ఈ సందర్భంగా మాట్లాడిన సీఎస్కే కెప్టెన్ మహేంద్ర సింగ్ ధోని.. ఈ ఓటమి చాలా బాధకలిగించిందన్నాడు. ఎక్కడ పొరపాటు జరిగిందో తెలుసుకోవాల్సిన అవసరం ఉందని పేర్కొన్నాడు. ఈ ఏడాది తమ జట్టుకు కలిసి రాలేదన్నాడు. ఈ ఐపీఎల్ సీజన్లో తమ ప్రదర్శన పేలవంగా ఉందని చెప్పాడు.
"ప్రతీ మ్యాచ్లో అనుకున్నవిధంగా రాణించలేం. రానున్న మూడు మ్యాచ్ల్లోనైనా బాగా ఆడాలని ఆశిస్తున్నా. పరుగులు తీయడంలో బ్యాట్స్మెన్ నిరాశపరిచారు. టాప్ ఆర్డర్ ఆటగాళ్లు వరుసగా పెవీలియన్ చేరడం వల్ల మిడిలార్డర్ బ్యాట్స్మెన్పై ఒత్తిడి పెరిగింది. క్లిష్ట పరిస్థితుల్లో ఉన్న జట్టుకు కాస్త అదృష్టం తోడవ్వాలి. కానీ మా విషయంలో అది జరగలేదు. ఈ ఐపీఎల్ సీజన్లో ఘోరంగా విఫలమయ్యాం".
-ధోని, చెన్నై సూపర్ కింగ్స్ జట్టు కెప్టెన్.
తేమతో తప్పని ఇబ్బంది
ఛేదనలో పిచ్పై తేమ తక్కువగా ఉండేదని.. కానీ, ఈసారి తొలుత బ్యాటింగ్ చేసి చాలా ఇబ్బందులు ఎదుర్కోవాల్సి వచ్చిందని ధోని అన్నాడు. పేలవ ప్రదర్శన కనబరిచినప్పుడు దాని వెనక చాలా కారణాలు ఉంటాయని పేర్కొన్నాడు.
"జట్టులో నలుగురు బ్యాట్స్మెన్ విఫలమైతే.. ఆ పరిణామాలను ఎదుర్కోవడం చాలా కష్టం. పరువును దృష్టిలో పెట్టుకునైనా రానున్న మూడు మ్యాచ్లు గెలవాలని ఆశిస్తున్నాం. వచ్చే ఏడాదికి మంచి ప్రణాళిక అవసరం. యువ ఆటగాళ్లకూ ఆవకాశం ఇవ్వడం ముఖ్యం".
-ధోని, సీఎస్కే కెప్టెన్.
ఇదీ చదవండి:చెన్నైపై ముంబయి ఘనవిజయం
