టీమ్ఇండియాతో తొలి రెండు టెస్టులకు 17 మందితో కూడిన జట్టును ప్రకటించింది ఇంగ్లాండ్ అండ్ వేల్స్ క్రికెట్ బోర్డు(England and Wales Cricket Board). మోచేతి గాయంతో ఆటకు దూరంగా ఉంటున్న ఆల్రౌండర్ జోఫ్రా ఆర్చర్ను ఈ సిరీస్కు కూడా పక్కన పెట్టింది. బెన్ స్టోక్స్, ఒల్లీ రాబిన్సన్ను(Ollie Robinson) తిరిగి జట్టులోకి తీసుకున్నారు. ఇక తొలి రెండు టెస్టులకు టీమ్లో చోటు దక్కని క్రిస్ వోక్స్కు.. తర్వాత మ్యాచ్ల కోసం తీసుకునే అవకాశం ఉంది.
జూన్లో కివీస్తో జరిగిన రెండు టెస్టుల సిరీస్కు దూరమైన స్టోక్స్ను తిరిగి జట్టులోకి తీసుకుంది ఇంగ్లాండ్. ఐపీఎల్లో వేలికి గాయమైన తర్వాత ఆటకు దూరంగా ఉన్న స్టోక్స్ను.. పాక్తో సిరీస్కు కూడా పక్కన పెట్టారు. కానీ, చాలా మంది కొవిడ్ బారిన పడటం వల్ల స్టోక్స్ కెప్టెన్గా మరో జట్టును సిద్ధం చేసింది ఇంగ్లాండ్. జోస్ బట్లర్, జానీ బెయిర్ స్టో, సామ్ కరన్ కూడా తిరిగి టీమ్లోకి వచ్చారు.
ఇదీ చదవండి: గ్రౌండ్లోనే గొడవ.. బ్యాట్లతో కొట్టుకున్న క్రికెటర్లు!
రాబిన్సన్ అప్పుడే..
ఎనిమిదేళ్ల క్రితం ట్విట్టర్ వేదికగా మహిళలపై విద్వేషపూరిత ట్వీట్లు చేశాడు రాబిన్సన్. సుదీర్ఘ ఫార్మాట్లో న్యూజిలాండ్పై అరంగేట్ర మ్యాచ్ ఆడిన అనంతరం ఇవి వెలుగులోకి వచ్చాయి. తక్షణ చర్యగా అతనిపై నిషేధం విధించింది ఇంగ్లాండ్ బోర్డు. అనంతరం అతనిపై దర్యాప్తు జరిపి.. 8 మ్యాచ్ల నిషేధం విధించింది. వాటిలో ఐదింటిని రెండేళ్లపాటు వాయిదా వేసింది. మిగిలిన 3 మ్యాచ్ల సస్పెన్షన్ను వెంటనే అమలు చేయాలని చెప్పింది. అయితే దర్యాప్తు కారణంగా న్యూజిలాండ్తో రెండో టెస్టు, సస్సెక్స్ టీ20లో రెండు మ్యాచ్లకు అతడు దూరంగా ఉండటాన్ని శిక్ష అనుభవించినట్లుగానే ప్యానెల్ భావించింది. దీంతో తిరిగి జట్టులోకి తీసుకుంది.
ఇక ఐదు టెస్టుల సిరీస్లో భాగంగా తొలి మ్యాచ్ ట్రెంట్ బ్రిడ్జ్ వేదికగా ఆగస్టు 4న ప్రారంభం అవుతుంది. రెండో టెస్టు లార్డ్స్ వేదికగా ఆగస్టు 12 నుంచి జరగనుంది.
ఇంగ్లాండ్ స్క్వాడ్..
జో రూట్(కెప్టెన్), జేమ్స్ అండర్సన్, జానీ బెయిర్ స్టో, డామ్ బెస్, స్టువర్ట్ బ్రాడ్, రోరీ బర్న్స్, జోస్ బట్లర్, జాక్ క్రావ్లే, సామ్ కరన్, హసీబ్ హమీద్, డాన్ లారెన్స్, జాక్ లీచ్, ఒల్లీ పోప్, ఒల్లీ రాబిన్సన్, డామ్ సిబ్లే, బెన్ స్టోక్స్, మార్క్ వుడ్.
ఇదీ చదవండి: ICC Rankings: మెరుగైన ధావన్, చాహల్ స్థానాలు
