పార్లమెంట్లో సోమవారం జరుగుతోన్న బడ్జెట్ 2021-22 ప్రసంగంలో ఆర్థికమంత్రి నిర్మలా సీతారామన్.. టీమ్ఇండియాపై ప్రశంసల జల్లు కురిపించారు. ఇటీవల ఆస్ట్రేలియాలో జరిగిన బోర్డర్-గావస్కర్ టెస్టు సిరీస్లో భారత జట్టు చారిత్రక విజయం సాధించిందని ఆమె కొనియాడారు.
"ఆస్ట్రేలియాలో టీమ్ఇండియా చారిత్రక విజయాన్ని సాధించడం పట్ల క్రికెట్ను ప్రేమించే దేశంగా మనమెంతో ఆనందించాం. ఆ సంతోషకర సమయాన్ని గుర్తు చేసుకోకుండా ఉండలేక పోతున్నా. యువతకు ఎలాంటి మద్దతు ఇస్తున్నామో అనేది ఈ విజయం ప్రతీక."
- నిర్మలా సీతారామన్, ఆర్థిక మంత్రి
ఆస్ట్రేలియా కంచుకోట గబ్బా మైదానంలో చివరి టెస్టును కైవసం చేసుకుని టీమ్ఇండియా చరిత్ర సృష్టించింది. 32ఏళ్ల తర్వాత ఆసీస్ను ఆ మైదానంలో ఓడించి చారిత్రక విజయం నమోదు చేసింది. అడిలైడ్లో తొలి టెస్ట్లో ఘోరంగా ఓడినా.. అద్భుతంగా పుంజుకుని 2-1తో సిరీస్ దక్కించుకుంది.
కాగా, ఆదివారం జరిగిన 'మన్ కీ బాత్' కార్యక్రమంలో ఆస్ట్రేలియాపై చారిత్రక విజయం సాధించిన భారత క్రికెట్ జట్టును అభినందించారు ప్రధానమంత్రి నరేంద్ర మోదీ. జట్టు పోరాటతత్వం ఎంతో అభినందనీయమని కొనియాడారు.
"క్రికెట్ ప్రపంచం నుంచి ఈ నెలలో శుభవార్త అందింది. ఆరంభంలో ఎదురుదెబ్బలు తిన్నా.. అద్వితీయంగా పుంజుకుని ఆస్ట్రేలియాలో టెస్టు సిరీస్ గెలిచాం. మన జట్టు కఠోర శ్రమ, సమష్టి కృషి ఎంతో స్ఫూర్తిదాయకం."
- నరేంద్ర మోదీ, ప్రధానమంత్రి
మోదీ ప్రశంసలకు కృతజ్ఞతలు తెలియజేసింది భారత క్రికెట్ నియంత్రణ మండలి(బీసీసీఐ). "మీ ప్రశంసలకు, ప్రోత్సాహానికి ధన్యవాదాలు మోదీజీ," అని ట్వీట్ చేసింది.
భారత్ వేదికగా ఇంగ్లాండ్తో జరగనున్న టెస్టు సిరీస్ ఫిబ్రవరి 5 నుంచి ప్రారంభంకానుంది.
ఇదీ చూడండి: ఇంగ్లాండ్తో టెస్టుకు జట్టును ప్రకటించిన జాఫర్
