ICC player of month: ప్రతి నెల అత్యుత్తమ ప్రదర్శన కనబర్చిన ఆటగాళ్లను ప్రోత్సహించేందుకు 'ప్లేయర్ ఆఫ్ ది మంత్' పేరిట అవార్డు అందిస్తోంది అంతర్జాతీయ క్రికెట్ మండలి. తాజాగా జనవరి నెలకుగానూ ఈ అవార్డు గ్రహీతను ప్రకటించింది. దక్షిణాఫ్రికా బ్యాటర్ కీగన్ పీటర్సన్ ఈ అవార్డు దక్కించుకున్నట్లు తెలిపింది. దక్షిణాఫ్రికా ప్లేయర్ డేవాల్డ్ బ్రెవిస్, బంగ్లాదేశ్ పేసర్ ఎబాడట్ హొస్సేన్తో పోటీపడి ఇతడు ఈ పురస్కారాన్ని అందుకున్నాడు.
మహిళల్లో ఇంగ్లాండ్ కెప్టెన్ హీథర్ నైట్కు ఈ అవార్డు వరించింది. ఈ అవార్డు రేసులో ఉన్న శ్రీలంక కెప్టెన్ చమరీ(Athapaththu), వెస్టిండీస్ స్టార్ డీన్ద్రా డాటిన్ను వెనక్కినెట్టి విజేతగా నిలిచింది.
టీమ్ఇండియాపై 2-1తేడాతో సిరీస్ను కైవసం చేసుకుంది దక్షిణాఫ్రికా. ఈ సిరీస్లోని రెండో మ్యాచులో 62, 28 పరుగులు, మూడో మ్యాచులో 72,82 రన్స్ చేసి జట్టు విజయంలో కీలకంగా వ్యవహరించాడు పీటర్సన్. మొత్తంగా ఈ సిరీస్లో అత్యధిక పరుగులు చేసిన ఆటగాడిగా నిలిచి ప్లేయర్ ఆఫ్ ది సిరీస్ అవార్డును దక్కించుకున్నాడు. ఇటీవలే యాషెస్ సిరీస్లో భాగంగా ఆస్ట్రేలియాపై జరిగిన ఏకైక టెస్టులో హీథర్ నైట్ అత్యధిక పరుగులు చేసిన ప్లేయర్గా నిలిచింది. ఈ మ్యాచ్లో 168, 48 పరుగులు చేసింది. ఈ మ్యాచ్ డ్రాగా ముగిసింది. ఈ ప్రదర్శన వల్లే వీరిద్దరికి ప్లేయర్ ఆఫ్ ది మంత్ అవార్డును ప్రకటించినట్లు ఐసీసీ తెలిపింది.
ఇదీ చూడండి: యువ క్రికెటర్ ఇ'షాన్దార్' గర్ల్ఫ్రెండ్!
