ఆర్సీబీ ఓపెనర్ దేవదత్ పడిక్కల్.. గత రెండు ఐపీఎల్ సీజన్లలోనూ బాగా ఆడి ఎమర్జింగ్ ప్లేయర్గా నిలిచాడు. చక్కని బ్యాటింగ్తో ఆకట్టుకుని, సెలక్టర్ల దృష్టిలోనూ పడ్డాడు. ఈ ఏడాది విజయ్ హజారే ట్రోఫీలోనూ ఎక్కువ పరుగులు చేసిన రెండో బ్యాట్స్మన్గా నిలిచి, జాతీయ జట్టులో చోటు కోసం ఎంతగానో శ్రమిస్తున్నాడు. కానీ అతడికి.. ప్రపంచటెస్టు ఛాంపియన్షిప్ ఫైనల్, ఇంగ్లాండ్తో టెస్టు సిరీస్ కోసం ఇటీవల ప్రకటించిన జంబో జట్టులోనూ చోటు దక్కలేదు. దీంతో ఫామ్లో ఉన్న అతడిని ఎందుకు తీసుకోలేదంటూ అభిమానులు ప్రశ్నించడం మొదలుపెట్టారు. దీనిపై స్పందించిన మాజీ చీఫ్ సెలక్టర్ ఎమ్మెస్కే ప్రసాద్.. అతడిని జట్టులోకి తీసుకోవడానికి కొంత సమయం పడుతుందని అన్నాడు.
"దేవదత్ను టెస్టు ఫార్మాట్లోకి తీసుకోవడానికి కొంత సమయం పడుతుంది. అతడు జట్టులోకి వచ్చే ముందు మరింత బలంగా తయారవ్వాలి. ఇందుకోసం మరో ఏడాది పాటు దేశవాళీ క్రికెట్ ఆడాల్సిన అవసరం ఉంది. అతడికి మంచి భవిష్యత్ ఉంది. తప్పకుండా జట్టులోకి వస్తాడు" అని ప్రసాద్ చెప్పాడు. ప్రసిద్ధ్ కృష్ణ, అవేశ్ఖాన్ ఎంపికవ్వడం గురించి మాట్లాడుతూ.. "భారత్ ఏ జట్టులో ప్రసిద్ధ్ కృష్ణ మంచి బౌలర్. బాగా ఆడుతున్నాడు. అవేశ్ కూడా ఐపీఎల్లో 145-147కిలోమీటర్ల వేగంతో బౌలింగ్ చేయగలడు. కాబట్టి ఇంగ్లాండ్లో టీమ్ఇండియాతో ప్రాక్టీస్ చేయడానికి వీరి బౌలింగ్ బాగా ఉపయోగపడుతుంది. మొత్తంగా వీరు భవిష్యత్లో జట్టుకు ఆడతారు" అని చెప్పాడు.
అయితే ప్రకటించిన జట్టులో హార్దిక్ పాండ్య, భువీ, కుల్దీప్, పృథ్వీ షా లాంటి ఆటగాళ్ల పేర్లు లేకపోవడం అందరినీ ఆశ్చర్యపరిచింది.
ఇదీ చూడండి: డబ్ల్యూటీసీ ఫైనల్ కోసం జట్టును ప్రకటించిన బీసీసీఐ
