ఆస్ట్రేలియాతో జరగనున్న మూడో టెస్టు తుది జట్టు కూర్పుపై కోహ్లీ చిన్ననాటి కోచ్ రాజ్కుమార్ శర్మ స్పందించాడు. రోహిత్ శర్మ లాంటి బ్యాట్స్మన్ జట్టులో చేరడం వల్ల టీమ్ఇండియా శిబిరంలో మరింత ఉత్సాహం వచ్చిందని అన్నాడు. అలాగే టెస్టు ఫార్మాట్లో నిలకడగా బౌలింగ్ చేసేందుకు నవదీప్ సైనీ సరైన ఎంపిక అని తెలిపాడు.
"రోహిత్ శర్మ లాంటి బ్యాట్స్మన్ జట్టులో చేరడం టీమ్ఇండియాకు కొత్త ఉత్సహాన్ని తెస్తుంది. అతడి లాగా హుక్ షాట్లు, పుల్షాట్లు ఆడే ఆటగాడు జట్టులో లేడు. ఆస్ట్రేలియా బౌలర్లను రోహిత్ ధీటుగా ఎదుర్కోగలడు".
- రాజ్కుమార్ శర్మ, కోహ్లీ చిన్ననాటి కోచ్
సిడ్నీ వేదికగా జరగనున్న మూడో టెస్టుతో టీమ్ఇండియా బౌలర్ నవదీప్ సైనీ సుదీర్ఘ ఫార్మాట్లో అరంగేట్రం చేయనున్నాడు. ఇటీవలే గాయం కారణంగా సిరీస్ నుంచి వైదొలగిన ఉమేశ్ యాదవ్ స్థానంలో సైనీని ఎంచుకున్నారు. సుదీర్ఘంగా బౌలింగ్ చేయాల్సిన క్రమంలో సైనీ అందుకు సరైన ఎంపిక అని కోహ్లీ కోచ్ రాజ్కుమార్ శర్మ అభిప్రాయపడ్డాడు.
"శార్దూల్ ఠాకూర్, నటరాజన్తో పోలిస్తే సైనీ గంటకు 140 కిలోమీటర్ల వేగంతో నిలకడగా బౌలింగ్ చేయగలడు. సుదీర్ఘ ఫార్మాట్లో సైనీతో జట్టుకు మరింత ప్రయోజనం. అలాగే రంజీట్రోఫీలోనూ సైనీకి అనుభవం ఉంది. ఈ అవకాశాన్ని అతను అందిపుచ్చుకుంటాడని భావిస్తున్నా" అని కోహ్లీ చిన్ననాటి కోచ్ రాజ్కుమార్ శర్మ చెప్పాడు.
భారత్, ఆస్ట్రేలియా మధ్య జరుగుతోన్న నాలుగు మ్యాచ్ల టెస్టు సిరీస్లో ఇరుజట్లు చెరో మ్యాచ్ గెలిచి సిరీస్ను సమం చేశాయి. గురువారం (జనవరి 7) సిడ్నీ వేదికగా మూడో టెస్టు ప్రారంభంకానుంది.
ఇదీచూడండి: కపిల్దేవ్ బర్త్డే: ప్రముఖుల శుభాకాంక్షల వెల్లువ
