ఐపీఎల్లో బయో సెక్యూర్ విధానాన్ని బిగ్బాస్ హౌస్తో పోల్చాడు దిల్లీ క్యాపిటల్స్ ఓపెనర్ శిఖర్ ధావన్. అయితే, క్రికెటర్గా ప్రతి అంశంలో మెరుగయ్యేందుకు ఇదొక మంచి అవకాశమని అభిప్రాయపడ్డాడు. బుధవారం ఓ మీడియాకు ఇచ్చిన ఆన్లైన్ ఇంటర్వ్యూలో.. పలు ఆసక్తికర విషయాలు పంచుకున్నాడు ధావన్.
కరోనా వ్యాప్తి కారణంగా ఈ ఏడాది ఐపీఎల్ను యూఏఈ వేదికగా బయో సెక్యూర్ పద్దతిలో నిర్వహించనున్నారు. భారత్లో కాకుండా.. ఈ విధంగా విదేశాల్లో లీగ్ను జరపడం మూడోసారి.
"బయో బబుల్ ప్రతి ఒక్కరికీ కొత్తగానే ఉంది. ఎంతో కఠినమైనది కూడా. అయితే, క్రికెటర్గా మెరుగయ్యేందుకు మంచి అవకాశంగా నేను భావిస్తున్నా. కచ్చితంగా ఎప్పటికీ నేను వినోదానికి దగ్గరగా ఉంటా. పరిస్థితులను సానుకూల పద్దతిలోనూ చూస్తా. ఈ బుడగలో మానసిక దృఢత్వాన్ని పరీక్షించుకోవడం చాలా ఆనందంగా ఉంది. దాదాపు బిగ్బాస్ హౌస్ లాంటిదే."
-- శిఖర్ ధావన్, దిల్లీ క్యాపిటల్స్ క్రికెటర్
ఆటను మెరుగుపరుచుకోవడమే కాకుండా భిన్నమైన బ్యాటింగ్ శైలి కోసం లాక్డౌన్ సమయాన్ని ఉపయోగించుకున్నట్లు ధావన్ తెలిపాడు. ఐదునెలల సుదీర్ఘ విరామం అనంతరం తిరిగి క్రికెట్ ఆడటమంటే.. మానసికంగా పెద్ద సవాలని పేర్కొన్నాడు. ఈసారి ఎలాగైనా దిల్లీ జట్టు ఐపీఎల్ ట్రోఫీ గెలుస్తుందని ఆశాభావం వ్యక్తం చేశాడు.
