ఆస్ట్రేలియాలో బాక్సింగ్ డే టెస్టును మెల్బోర్న్లో నిర్వహించడం ఆనవాయితీ. అయితే ఈ ఏడాది భారత్తో సిరీస్లో భాగంగా బాక్సింగ్ డే టెస్టుకు అడిలైడ్ ఆతిథ్యం ఇచ్చే అవకాశముందని వార్తలు వచ్చాయి. వీటిపై స్పందించిన ఆస్ట్రేలియా బోర్డు.. ఆ మ్యాచ్ వేదికపై నిర్ణయం తీసుకోవడానికి చాలా సమయం ఉందని తెలిపింది. టెస్టు జరిగే సమయానికి పరిస్థితులు చక్కబడతాయని ఆశాభావం వ్యక్తం చేసింది.
"ప్రస్తుతం చాలా ఆంక్షలు ఉన్నాయి. అయితే ఈ పరిస్థితి నుంచి త్వరగా బయటపడతాం. ప్రజలు కూడా బయటకు వస్తారు. లైవ్ ఈవెంట్లు నిర్వహిస్తాం. బాక్సింగ్ డే టెస్టు నాటికి సాధారణ పరిస్థితులు వస్తాయని అనుకుంటున్నాం. అదే జరిగితే మెల్బోర్న్లోనే బాక్సింగ్ డే మ్యాచ్ జరుగుతుంది"
- క్రికెట్ ఆస్ట్రేలియా
ఇప్పటికే మెల్బోర్న్ నగరం ఉన్న విక్టోరియా రాష్ట్రంలో 13 వేలకు పైగా కరోనా కేసులు నమోదయ్యాయి. అడిలైడ్ రాజధానిగా ఉన్న దక్షిణ ఆస్ట్రేలియాలో 457 కేసులే నమోదు కాగా.. 445 మంది కోలుకున్నారు. షెడ్యూల్ ప్రకారం డిసెంబర్ 3న బ్రిస్బేన్లో తొలి టెస్టుతో భారత్-ఆస్ట్రేలియా మధ్య నాలుగు టెస్టుల సిరీస్ ఆరంభమవుతుంది. గబ్బా, అడిలైడ్, మెల్బోర్న్, సిడ్నీ వేదికగా మ్యాచ్లు జరగనున్నాయి.
