ఈ ఏడాది భారత్లో టీ20 ప్రపంచకప్ జరగబోతుంది. అయితే ఈ టోర్నీకి ముందు టీమ్ఇండియాకు ఐపీఎల్ తప్ప మరే ఇతర ద్వైపాక్షిక టీ20 సిరీస్లు లేవు. కాగా, తాజాగా ఈ విషయంపై స్పందించిన బీసీసీఐ సీనియర్ అధికారి ఒకరు ఐపీఎల్ తర్వాత న్యూజిలాండ్, దక్షిణాఫ్రికాలతో టీ20 సిరీస్లు నిర్వహించే ప్రణాళికల్ని పరిశీలిస్తున్నట్లు తెలిపారు. త్వరలోనే దీనిపై స్పష్టత వస్తుందని వెల్లడించారు.
"టీ20 ప్రపంచకప్ కంటే ముందు దక్షిణాఫ్రికా, న్యూజిలాండ్ జట్లు భారత్లో టీ20 సిరీస్ ఆడేందుకు సిద్ధంగా ఉన్నాయి. ఇంకా తేదీలు ఖరారు కాలేదు. మెగాటోర్నీ ప్రారంభానికి ముందు భారత్కు టీ20ల్లో తగినంత ప్రాక్టీస్ అవసరమని బోర్డు భావిస్తోంది"
-బీసీసీఐ అధికారి
భారత్-దక్షిణాఫ్రికా మధ్య ఇప్పటికే ఓ సిరీస్ ప్రతిపాదన ఉంది. మార్చిలో కరోనా వల్ల వాయిదా పడిన సిరీస్ స్థానంలో మరో సిరీస్ నిర్వహించాల్సి ఉంది. ప్రస్తుతం ఇంగ్లాండ్తో జరుగుతోన్న టీ20 సిరీస్ తర్వాత ఈ ఫార్మాట్లో భారత్కు మరో టీ20 సిరీస్ లేదు.
ఐపీఎల్ తర్వాత భారత జట్టు టెస్టు ఛాంపియన్ షిప్ ఫైనల్, ఇంగ్లీష్ జట్టుతో ఐదు టెస్టు మ్యాచ్లు ఆడేందుకు ఇంగ్లాండ్ పయనమవనుంది. తిరిగి స్వదేశానికి సెప్టెంబర్ మధ్యలో రానుంది. ఈ ఏడాది జరగాల్సిన ఆసియా కప్ కూడా సందిగ్ధంలో పడింది. వాయిదా పడిన పాకిస్థాన్ సూపర్ లీగ్ నిర్వహణతో పాటు భారత్ టెస్టు ఛాంపియన్ షిప్ ఫైనల్ ఆడాల్సి రావడం ఇందుకు కారణం.
ఈ ఏడాది టీ20 ప్రపంచకప్ తర్వాత స్వదేశంలో న్యూజిలాండ్తో టెస్టు సిరీస్లో పాల్గొననుంది టీమ్ఇండియా. ఆ తర్వాత డిసెంబర్-జనవరిలో దక్షిణాఫ్రికా పయనమై.. అక్కడ టెస్టు, పరిమిత ఓవర్ల సిరీస్ ఆడనుంది.
