టీమ్ఇండియా దిగ్గజ క్రికెటర్ సచిన్ తెందూల్కర్ తనయుడు అర్జున్ తెందూల్కర్కు ఎట్టకేలకు కోరుకున్న అవకాశం లభించింది. వచ్చే ఏడాది జనవరిలో సయ్యద్ ముస్తాక్ అలీ టోర్నీలో పాల్గొనే అవకాశాన్ని దక్కించుకున్నాడు. ఈ టోర్నీలో ముంబయి జట్టు తరఫున బరిలో దిగనున్నాడు అర్జున్. ఈ విషయాన్ని సదరు జట్టు చీఫ్ సెలక్టర్ సలీల్ అంకోలా శనివారం స్పష్టం చేశారు.
"బీసీసీఐ జట్టులో తొలుత 20మందిని మాత్రమే ఎంపిక చేయాలని ఆదేశించింది. కానీ తర్వాత జట్టులోని ఆటగాళ్ల సంఖ్యను 22కు పెంచుతూ నిర్ణయం తీసుకుంది. దీంతో అర్జున్ తెందూల్కర్, కృతిక్ హంగవాడిని ఎంపిక చేశాం."
-సలీల్ అంకోలా, ముంబయి జట్టు చీఫ్ సెలక్టర్
సయ్యద్ ముస్తాక్ అలీ టోర్నీ కోసం తొలుత 20మందితో కూడిన జట్టును ప్రకటించింది ముంబయి. అయితే ఈ బృందంలో అర్జున్ను ఎంపిక చేయలేదు సెలక్టర్లు. అంతకుముందు ముంబయి ప్రాబబుల్స్‌లో చోటు దక్కించుకున్న అతడు.. అనంతరం జరిగిన ప్రాక్టీస్ మ్యాచుల్లో అంచనాల్ని అందుకోలేకపోయాడు. దీంతో సెలక్టర్లు అతడిని పక్కన పెట్టారు. ప్రస్తుతం బీసీసీఐ జట్టు సభ్యులను పెంచుకోవచ్చని నిర్ణయం తీసుకున్న నేపథ్యంలో అర్జున్తో పాటు మరొకరికి చోటు దక్కింది.
ఇదీ చూడండి : దేశవాళీ టోర్నీలో సచిన్ తనయుడికి నో ఛాన్స్
