Asia Cup 2022 Pak vs Afg : భారత్ ఆశలు ఆవిరయ్యాయి. అఫ్గానిస్థాన్పై సూపర్-4 మ్యాచ్లో గెలిచిన పాక్.. ఆసియా కప్ ఫైనల్లోకి దూసుకెళ్లింది. శ్రీలంక, పాకిస్థాన్ టైటిల్ కోసం పోటీపడనున్నాయి. దీంతో ఆసియా కప్లో ఘనచరిత్ర ఉన్న టీమ్ ఇండియా ఈసారి ఫైనల్ చేరకుండానే ఇంటిముఖం పట్టింది.
తొలుత టాస్ గెలిచిన పాక్ కెప్టెన్ బాబర్ అజామ్.. అఫ్గాన్ను బ్యాటింగ్కు ఆహ్వానించాడు. అఫ్గానిస్థాన్ నిర్ణీత ఓవర్లలో 6 వికెట్లకు 129 పరుగులు మాత్రమే చేయగలిగింది. ఇన్నింగ్స్ ధాటిగానే ప్రారంభించిన ఓపెనర్లు హజ్రతుల్లా జజాయ్, రహ్మనుల్లా గుర్బాజ్.. 3.5 ఓవర్లలో 36 పరుగులు జోడించారు. గుర్బాజ్ 2 సిక్సర్లతో 17 పరుగులు చేసి రవూఫ్ బౌలింగ్లో వెనుదిరిగాడు. కాసేపటికే జజాయ్ కూడా (17 బంతుల్లో 21) అవుటయ్యాడు. అఫ్గాన్ బ్యాటర్లలో ఇబ్రహీం జద్రాన్ (37 బంతుల్లో 35) టాప్ స్కోరర్.
పాక్ బౌలర్లలో హారిస్ రవూఫ్ 2 వికెట్లు తీశాడు. నసీం షా, హస్నైన్, నవాజ్, షాదాబ్ ఖాన్ తలో వికెట్ పడగొట్టారు.
130 పరుగుల లక్ష్యంతో బరిలోకి పాక్కు ఆదిలోనే షాక్ తగిలింది. స్కోరు 1 వద్దే బాబర్ డకౌట్ అయ్యాడు. 18కే 2 వికెట్లు కోల్పోయింది. రిజ్వాన్(20), ఫఖార్ జమాన్(5) రన్స్ చేశారు. నాలుగో వికెట్కు ఇఫ్తిఖార్ అహ్మద్, షాదాబ్ ఖాన్ 42 పరుగులు జోడించి ఇన్నింగ్స్ను గాడినపెట్టారు. షాదాబ్ ఖాన్ ఫోర్, 3 సిక్సర్లతో 26 బంతుల్లోనే 36 పరుగులు చేసి పాక్ను లక్ష్యం దిశగా తీసుకెళ్లి.. వేగంగా ఆడే క్రమంలో 17వ ఓవర్లో పెవిలియన్ చేరాడు.
ఆ తర్వాత అఫ్గాన్ పుంజుకుంది. 18వ ఓవర్ వేసిన ఫరూకీ 4 పరుగులు మాత్రమే ఇచ్చి మహ్మద్ నవాజ్, ఖుష్దిల్ షాను పెవిలియన్ చేర్చాడు. 19వ ఓవర్లోనూ అహ్మద్ మాలిక్ రెండు వికెట్లు తీశాడు.
అఫ్గాన్ బౌలర్లలో రషీద్ ఖాన్ 2 వికెట్లు తీయగా.. ఫరూకీ, మాలిక్ చెరో 3 వికెట్లు పడగొట్టారు. ఫరూకీ ఆఖరి ఓవర్ వేయగా తొలి రెండు బంతుల్నే సిక్సర్లుగా మలిచి నసీం షా పాక్ను గెలిపించాడు. హీరో అయ్యాడు. దీంతో లంక, పాక్ ఫైనల్లో తలపడనున్నాయి. ఇండియా, అఫ్గానిస్థాన్ ఇంటిదారి పట్టాయి.
