కరోనా కారణంగా ఒలింపిక్ అర్హత పోటీ అయిన ఇండియా ఓపెన్ బ్యాడ్మింటన్ టోర్నమెంట్ వాయిదా పడింది. ప్రస్తుతం ఆ టోర్నీ నిర్వహణకు తాజాగా ప్రణాళిక రూపొందింది. డిసెంబరు 8 నుంచి 13 వరకు టోర్నీ జరుగుతుందని ప్రపంచ బ్యాడ్మింటన్ సమాఖ్య (బీడబ్ల్యూఎఫ్) తాజాగా ప్రకటించింది.
ఇండియా ఓపెన్ బ్యాడ్మింటన్ టోర్నమెంట్ దిల్లీ వేదికగా మార్చి 24-29 వరకు జరగాల్సింది. కానీ, కరోనా మహమ్మారి కారణంగా గతంలో దీన్ని నిరవధిక వాయిదా వేశారు. ప్రపంచవ్యాప్తంగా బ్యాడ్మింటన్ టోర్నీల నిర్వహణకు కొత్త క్యాలండర్ను బీడబ్ల్యూఎఫ్ విడుదల చేసింది. దీని కంటే ముందుగా హైదరాబాద్ ఓపెన్ (ఆగస్టు 11-16), సయీద్ మోదీ అంతర్జాతీయ టోర్నమెంట్ (నవంబరు 17-22) జరగనున్నాయి.
మరో ఎనిమిది టోర్నమెంట్ల నిర్వహణ తేదీలను రీషెడ్యూల్ చేసింది ప్రపంచ బ్యాడ్మింటన్ సమాఖ్య(బీడబ్ల్యూఎఫ్). అందులో న్యూజిలాండ్ ఓపెన్ సూపర్-300, ఇండోనేషియా ఓపెన్ సూపర్-1000, మలేసియా ఓపెన్ సూపర్-750, థాయిలాండ్ ఓపెన్ సూపర్-500, చైనాలో వరల్డ్ టూర్ ఫైనల్స్ తేదీలనూ ప్రకటించింది.
"బ్యాడ్మింటన్ టోర్నీల నిర్వహణకు తిరిగి ప్రణాళికలను తయారు చేయడం చాలా కష్టమైన పని. ఈ ప్రణాళికకు కట్టుబడి ఉంటాం. ఎందుకంటే అన్ని పరిస్థితులు బాగున్నప్పుడు మా ప్రయాణాన్ని మొదలు పెడతామని ఆశిస్తున్నాం. అలాగే, ప్రస్తుత సమయంలో అంతర్జాతీయ ప్రయాణాలు ఎప్పడు మొదలవుతాయో ఊహించడం కష్టం. టోర్నీలకు షెడ్యూల్ వేసిన సమయం సురక్షితం కాదు అని స్పష్టంగా తెలిస్తే పోటీలను నిర్వహించం".
-థామస్ లండ్, బీడబ్ల్యూఎఫ్ సెక్రటరీ జనరల్
ఇదీ చూడండి.. నిప్పు.. నీరు కలిస్తే ఓ ట్రెండ్
