యంగ్టైగర్ ఎన్టీఆర్ కథానాయకుడిగా చిత్ర పరిశ్రమలోకి అడుగు పెట్టి ఇరవై ఏళ్లు అయింది. 'నిన్ను చూడాలని' అంటూ నూనూగు మీసాలతో కనిపిస్తూ ప్రేక్షకుల ముందుకొచ్చారు. అనతికాలంలోనే స్టార్‌ ఇమేజ్‌ని సొంతం చేసుకున్నారు. ఆ తర్వాత ఆటుపోట్లనీ ఎదుర్కొన్నారు. మొత్తంగా పడి లేచిన కెరటాన్ని గుర్తు చేసే ఎన్టీఆర్ ప్రయాణం చాలా ప్రత్యేకమైనది.
ఎన్టీఆర్ 20 ఏళ్ల ప్రయాణం గురించి ఆయన అభిమానులు సామాజిక మాధ్యమాల్లో ప్రత్యేక డీపీలతో సందడి చేస్తున్నారు. కొన్నాళ్లుగా 'ఆర్ఆర్ఆర్' చిత్రీకరణతో బిజీగా గడుపుతూ వచ్చిన ఎన్టీఆర్, ఇటీవలే కుటుంబంతో కలిసి దుబాయ్ వెళ్లారు. అక్కడి నుంచి రాగానే మళ్లీ హైదరాబాద్‌లోనే 'ఆర్ఆర్ఆర్' చిత్రీకరణతో బిజీ కాబోతున్నారు. అది పూర్తి కాగానే, త్రివిక్రమ్‌ దర్శకత్వం వహించనున్న చిత్రం కోసం రంగంలోకి దిగుతారు.
