Whatsapp Edit Message Feature : ప్రపంచవ్యాప్తంగా అత్యధిక మంది వాడే సోషల్ మీడియా ప్లాట్ఫామ్లలో వాట్సాప్ ఒకటి. దాదాపు ప్రతి ఒక్కరి స్మార్ట్ఫోన్లో ఈ యాప్ కచ్చితంగా ఉంటుంది! 2009లో ప్రారంభమైన ఈ ఆన్లైన్ ఇన్స్టంట్ మెసేజింగ్ యాప్.. అనతి కాలంలోనే విశేష ఆదరణ పొందింది. తర్వాత ఈ యాప్ను ఫేస్బుక్ వ్యవస్థాపకుడు మార్క్ జుకర్బర్గ్ కొనుగోలు చేశారు. అయితే వాట్సాప్ తమ యూజర్ల కోసం ఎప్పటికప్పుడు కొత్త కొత్త ఫీచర్లను అందుబాటులోకి తీసుకొస్తుంటుంది. తాజాగా మరో సూపర్ ఫీచర్ అందుబాటులోకి తీసుకొచ్చింది.
సాధారణంగా వాట్సాప్లో ఎవరికైనా మెసేజ్ పంపించే ముందు టైప్ చేస్తుంటే అక్షర దోషాలు వస్తుంటాయి. అవి చూసుకోకుండా సెండ్ బటన్ మీద క్లిక్ చేసి మనం పంపించేస్తాం. ఆ తర్వాత చూసుకుని అరెరే పెద్ద సమస్య వచ్చి పడిందే అని డిలీట్ చేయడమో లేక దాని తర్వాత సరిచేసి వేరే మెసేజ్ టైప్ చేసి పంపుతాం. అదే మెసేజ్ కాస్త పెద్దదైతే మళ్లీ టైప్ చేయలేక కాపీ చేసి దాన్నే సరిచేసి పంపుతాం. ఇంత ప్రాసెస్ అవసరమా? అదే మెసేజ్ను ఎడిట్ చేసే అవకాశం ఉంటే బాగుంటుంది కదా అని మనకు అనిపిస్తుంటుంది.
అయితే పంపిన మెసేజ్ను ఎడిట్ చేసే ఫీచర్ను వాట్సాప్ అందుబాటులోకి తీసుకొచ్చింది. పొరపాటున తప్పుగా మెసేజ్ పంపినా ఎడిట్ చేసుకునే వీలు కల్పించింది. ఈ ఏడాది ప్రారంభంలో డెవలపర్లు ఈ ఫీచర్ను టెస్ట్ చేసినట్లు తెలుస్తోంది. మెసేజ్ పంపించిన 15 నిమిషాల్లో ఎడిట్ చేసుకునే విధంగా సరికొత్త ఫీచర్ను టెస్ట్ చేసినట్లు సమాచారం.
వాట్సాప్ బేటా వెర్షన్లో ఈ ఫీచర్ను టెస్ట్ చేసినట్లు 'వాట్సాప్ బేటా ఇన్ఫో' అనే వెబ్సైట్ వెల్లడించింది. వాట్సాప్ వెబ్ బేటా వెర్షన్ ఈ ఫీచర్ను పొందిన కొన్ని రోజులకే కొంతమంది వినియోగదారులు ఆండ్రాయిడ్ 2.23.10.13 వెర్షన్స్లో చాట్స్, గ్రూప్స్లో పంపిన సందేశాలను ఎడిట్ చేయగలుగుతున్నారు. దీనికి సంబంధించిన స్క్రీన్ షాట్ కూడా వెబ్ సైట్లో ఉంది. ఈ స్క్రీన్ షాట్ను గమనిస్తే.. పంపిన మెసేజ్ను సెలెక్ట్ చేస్తే.. కుడి వైపున పైన ఇన్ఫో, కాపీ, ఎడిట్ అనే ఆప్షన్స్ కనపడతాయి. ఎడిట్ ఆప్షన్ మీద క్లిక్ చేస్తే మెసేజ్ను ఎడిట్ చేయవచ్చు.
ఈ ఫీచర్ ద్వారా మనం ఎన్నిసార్లు అయినా సందేశాన్ని సవరించుకోవచ్చు.. కానీ మెసేజ్ పంపిన 15 నిమిషాల లోపే చేసుకోవాలి. ఆ తర్వాత వాట్సాప్ అందుకు అనుమతించదు. ప్రస్తుతం ఈ ఫీచర్ బీటా యూజర్లకు మాత్రమే అందుబాటులో ఉంది. కేవలం మెసేజ్లను మాత్రమే ఎడిట్ చేసుకునేలా ఈ ఫీచర్ను వాట్సాప్ రూపొందించింది. భవిష్యత్తులో ఈ ఫీచర్ను మరింత అప్డేట్ చేసే అవకాశం ఉంది!
