మనీలాండరింగ్, బ్యాంకు మోసాలకు పాల్పడిన కేసులలో విచారణ నిమిత్తం విజయ్ మాల్యాను భారత్కు అప్పగించాలని ఏప్రిల్ 20న తీర్పునిచ్చింది లండన్ హైకోర్టు. ఈ తీర్పును సమీక్షించాలని బ్రిటన్ సుప్రీం కోర్టులో పిటిషన్ దాఖలు చేశాడు మాల్యా. హైకోర్టు ఇచ్చిన రెండు వారాల గడువు ముగుస్తున్నందున ఈ మేరకు సుప్రీంను ఆశ్రయించాడు.
మాల్యా దాఖలు చేసిన అప్పీల్పై స్పందించేందుకు తమకు మే 14 వరకు సమయముందని భారత్ తరఫున ఈ కేసును వాదిస్తున్న బ్రిటన్ న్యాయవాది తెలిపారు.
లండన్ హైకోర్టు తీర్పును సుప్రీంకోర్టు కచ్చితంగా సమర్థిస్తుందని అక్కడి న్యాయనిపుణులు చెబుతున్నారు. మాల్యాకు భంగపాటు తప్పదని స్పష్టం చేస్తున్నారు హైకోర్టు తీర్పు ఇచ్చినప్పుడు కూడా వెస్ట్ మెజిస్ట్రేట్ కోర్టు ఇచ్చిన తీర్పులో తప్పులేదని చెప్పినట్లు గుర్తు చేశారు.
బ్రిటన్ కోర్టులో మాల్యాకు చుక్కెదురైతే ఐరోపా మానవ హక్కుల న్యాయస్థానాన్ని ఆశ్రయించే అవకాశం ఉంది.
భారత్లో రూ.9,000 కోట్ల మేర బ్యాంకు మోసాలకు పాల్పడినట్లు మాల్యాపై ఆరోపణలున్నాయి.
