ప్రపంచంపై కరోనా రక్కసి కోరలు చాస్తోంది. ఇప్పటివరకు 4కోట్ల 70లక్షల మందికి వైరస్ సోకింది. 12లక్షల 7వేల మందికిపైగా మహమ్మారి బలితీసుకుంది. కొవిడ్ బారినపడిన వారిలో 3కోట్ల 38లక్షల మంది కోలుకున్నారు. ప్రస్తుతం 1.19 కోట్ల యాక్టివ్ కేసులు ఉన్నాయి.
జర్మనీలో మళ్లీ లాక్డౌన్..
కరోనాను అరికట్టేందుకు.. ఐరోపా దేశాలు లాక్డౌన్ విధించనున్నాయి. జర్మనీలో నాలుగు వారాల పాటు పాక్షిక లాక్డౌన్ విధించింది ప్రభుత్వం. ఫలితంగా ఈ నెలాఖరు వరకు రెస్టారెంట్లు, బార్లు, సినిమా థియేటర్లు వంటివి మూతపడనున్నాయి. అయితే.. పాఠశాలలు, నిత్యవసర వస్తువుల దుకాణాలు, క్షౌరశాలలకు ఆంక్షల నుంచి మినహాయింపు ఉంటుంది. ఆ దేశంలోలో ఇప్పటివరకు 5.48 లక్షల మందికి వైరస్ సోకింది. వారిలో 10,638 మంది చనిపోయారు.
స్పెయిన్లో కర్ఫ్యూ..
స్పెయిన్లో కరోనా మరోసారి పంజా విసురుతున్న తరుణంలో పాక్షిక లాక్డౌన్ అమలు చేయనుంది ఆ దేశం. రోజూ రాత్రి 10 గంటల నుంచి కర్ఫ్యూ విధిస్తున్నట్టు ప్రకటించింది. కరోనా కేసుల పరంగా ఆరో స్థానంలో ఉన్న స్పెయిన్లో ఇప్పటివరకు 12.64 లక్షల వైరస్ కేసులు వెలుగుచూశాయి. 35వేల 878 మంది కొవిడ్తో మృతిచెందారు.
ఆయా దేశాల్లో కరోనా తీరు ఇలా..
- రష్యాలో మరో 18,257 మంది మహమ్మారి బారినపడ్డారు. కేసుల సంఖ్య 16లక్షల 55వేలు దాటింది. మరో 238 మరణాలతో.. మొత్తం మృతుల సంఖ్య 28,473కు చేరింది.
- ఇరాన్లో వైరస్ ఉద్ధృతి కొనసాగుతోంది. మరో 8,289 మందికి కరోనా నిర్ధరణ అయింది. బాధితుల సంఖ్య 4.78లక్షలకు పెరిగింది. వైరస్ కారణంగా మరో 440 మంది చనిపోగా.. మరణాల సంఖ్య 35,738కు చేరింది.
- పాక్లో ఒక్కరోజులోనే 1,123 మందికి కరోనా సోకినట్టు తేలింది. ఫలితంగా మొత్తం కేసుల సంఖ్య 3.35లక్షలకు పెరిగింది. దాయాది దేశంలో ఇప్పటివరకు 6,835 మంది కరోనా కాటుకు బలయ్యారు.
- నేపాల్లో సోమవారం ఒక్కరోజే 2,933 మందికి కొవిడ్ పాజిటివ్గా తేలింది. బాధితుల సంఖ్య 1,76,500కు ఎగబాకింది. ఇప్పటివరకు అక్కడ 984 మరణాలు నమోదయ్యాయి.
ఇదీ చదవండి: అధ్యక్ష పోరు: అమెరికా ఎన్నికల ఫలితాలు ఆలస్యం- ఎందుకంటే?
