ప్రపంచవ్యాప్తంగా పెగాసస్ స్పైవేర్ కలకలం రేపుతోంది. ఈ స్పైవేర్ ద్వారా డేటా లీక్ వ్యవహారంపై విచారణ చేపట్టాలని ఫ్రాన్స్ అధ్యక్షుడు ఇమాన్యుయేల్ మేక్రాన్.. ఆ దేశంలోని వివిధ దర్యాప్తు సంస్థలను ఆదేశించారు. మేక్రాన్ ఫోన్ నంబర్ సహా ఆ దేశ మాజీ ప్రధాని, 20 మది కేబినెట్ మంత్రుల వివరాలు లీకైనట్లు తెలిసిన నేపథ్యంలో ఈ విచారణకు ఆదేశాలు జారీ చేయడం గమనార్హం.
పెగాసస్ లీకేజీ వ్యవహారంపై అధ్యక్ష భననం ఎలీసీ.. వేర్వేరు దర్యాప్తు సంస్థలను విడివిడిగా విచారణ చేపట్టాలని ఆదేశించినట్లు ప్రధాని జీన్ కాస్టెక్స్ వెల్లడించారని ఓ వార్తా సంస్థ పేర్కొంది. అయితే ఈ అంశంపై ఇప్పుడే మరిన్ని వివరాలు వెల్లడించడం సరైంది కాదని ఆయన అభిప్రాయపడ్డట్లు వివరించింది.
డేటా లీక్పై ఆందోళన..
ఫ్రాన్స్ అధ్యక్షుడు ఇమాన్యుయేల్ మేక్రాన్ సహా దాదాపు 20 మంది కేబినెట్ మంత్రులు, ప్రజా ప్రతినిధుల ఫోన్ నంబర్లు, ఇతర వివరాలు లీకైనట్లు ఇటీవల తెలిసింది. మొత్తం లీకైన 50వేల ఫోన్ నంబర్ల లిస్ట్లో వీరి నంబర్లు ఉన్నట్లు వెల్లడైంది. ఇందులో న్యాయ, విదేశీ వ్యవహారాల శాఖలకు చెందిన వివరాలు కూడా ఉన్నట్లు తేలింది. దీనితో మేక్రాన్ సహా ఇతర మంత్రులు ఆందోళన వ్యక్తం చేశారని ఓ మీడియా కథనం పేర్కొంది.
