అఫ్గాన్ను ఆక్రమించుకున్న తాలిబన్లకు అంతర్జాతీయ ద్రవ్యనిధి సంస్థ(ఐఎంఎఫ్‌) భారీ షాక్ ఇచ్చింది. ఐఎంఎఫ్‌ వనరులు తీసుకునే హక్కును నిలిపివేస్తున్నట్లు ప్రకటించింది. ఇప్పటికే కేటాయించిన నిధులను తీసుకునేందుకు అనుమతి నిరాకరిస్తున్నట్లు వెల్లడించింది. అఫ్గాన్ ప్రభుత్వ గుర్తింపుపై స్పష్టత లేకపోవడం వల్లే ఈ నిర్ణయం తీసుకున్నట్లు చెప్పింది.
అంతకుముందు.. అఫ్గాన్ కోసం కేటాయించిన సుమారు 950 కోట్ల డాలర్ల నిధులను అమెరికా అధ్యక్షుడు జో బైడెన్ స్తంభింపజేశారు. తాలిబన్ల చేతికి నిధులు అందకుండా చేసేందుకే ఈ ఆంక్షలు విధించారు.
ఈ విషయాన్ని అమెరికా ఆర్థిక శాఖ మంత్రి జానెట్ యెల్లెన్ ధ్రువీకరించినట్లు వాషింగ్టన్ పోస్ట్ వెల్లడించిందని.. పాక్కు చెందిన డాన్ పత్రిక తెలిపింది. 'అమెరికాలో అఫ్గాన్ ప్రభుత్వానికి ఉన్న కేంద్రీయ బ్యాంకుల ఆస్తుల్ని తాలిబన్లకు అందకుండా చూస్తాం'అని ఓ అధికారి స్పష్టం చేశారని పేర్కొంది. ఈ నిర్ణయం తీసుకునే ముందు అమెరికా విదేశాంగ శాఖతో పాటు శ్వేతసౌధాన్ని సంప్రదించినట్లు అధికారులు పేర్కొన్నారు. ఇదే కాకుండా, తాలిబన్లపై ఒత్తిడి తెచ్చేందుకు ఇతర చర్యలనూ బైడెన్ యంత్రాంగం పరిశీలిస్తోందని తెలిపారు.
అఫ్గాన్కు వచ్చేందుకు..
మరోవైపు.. తాలిబన్ల ఆక్రమణ తర్వాత దేశాన్ని వీడి పరారైన అఫ్గాన్ మాజీ అధ్యక్షుడు అష్రఫ్ ఘనీ.. తిరిగి అఫ్గాన్కు వచ్చేందుకు సంప్రదింపులు జరుపుతున్నారని ఏఎఫ్పీ వార్తాసంస్థ తెలిపింది. ఆయన దేశ ప్రజలతో మాట్లాడుతారని చెప్పింది.
