టెర్రర్ ఫైనాన్సింగ్(ఉగ్రవాదులకు నిధులు సమకూర్చడం) కేసులో పాకిస్థాన్ లాహోర్ హైకోర్టు కీలక తీర్పు వెలువరించింది. 2008 మంబయి ఉగ్రదాడుల సూత్రధారి హఫీజ్ సయీద్ అధినేతగా ఉన్న జమాత్ ఉద్ దవాకు(జేయూడీ) చెందిన ఆరుగురు నేతలను నిర్దోషులుగా ప్రకటించింది. ఈ మేరకు పాకిస్థాన్ మీడియా తెలిపింది. నిషేధిత ఉగ్రసంస్థ లష్కరే-తోయిబాకు(ఎల్ఈటీ) అనుబంధ విభాగంగా జేయూడీ పని చేస్తోంది.
ఈ కేసులో మాలిక్ జాఫర్ ఇక్బాల్, యహ్యా ముజాహిద్, నస్రుల్లా, సైముల్లా, ఉమర్ బహదూర్కు ట్రయల్ కోర్టు తొలుత తొమ్మిదేళ్ల జైలు శిక్ష విధించింది. హఫీజ్ అబ్దుల్ రెహమాన్ మక్కీకి ఆరు నెలల జైలు శిక్ష విధించింది. అయితే.. వారు ఈ తీర్పును సవాలు చేస్తూ లాహోర్ హైకోర్టు డివిజన్ బెంచ్లో అప్పీలు దాఖలు చేశారు. దీనిపై జస్టిస్ మహమ్మద్ అమీర్ భట్టీ, జస్టిస్ తారిఖ్ సలీమ్ నేతృత్వంలోని ధర్మాసనం విచారణ జరిపింది.
నిందితులపై మోపిన అభియోగానికి సంబంధించి సరైన సాక్ష్యాధారాలను సమర్పించడంలో ప్రాసిక్యూషన్ విఫలమైందని పిటిషనర్ల తరఫు న్యాయవాది కోర్టుకు తెలిపారు. ట్రయల్ కోర్టు సాక్ష్యాధారాలను సరిగ్గా పరిశీలించకుండానే నిందితులకు శిక్ష విధించిందని చెప్పారు. అల్-అన్ఫాల్ ట్రస్టులో సభ్యులైన నిందితులకు లష్కరే తోయిబాతో ఏ సంబంధమూ లేదని పేర్కొన్నారు. అయితే.. ఎల్ఈటీతో కలిసి నిందితులు పని చేస్తున్నారని అదనపు ప్రాసిక్యూటర్ జనరల్.. ధర్మాసనానికి నివేదించారు.
వాదనలు విన్న ధర్మాసనం.. సరైన సాక్ష్యాధారాలు లేనందున నిందితులను నిర్దోషులుగా ప్రకటిస్తూ తీర్పు వెలువరించింది.
2008 ముంబయి ఉగ్రదాడులకు లష్కరే తోయిబానే పాల్పడింది. ఈ ఘటనలో 160 మందికి పైగా ప్రాణాలు కోల్పోయారు.
ఇదీ చూడండి: ఇరాక్ ప్రధానమంత్రిపై హత్యాయత్నం
