అఫ్గానిస్థాన్ను తాలిబన్లు(Afghanistan Taliban) హస్తగతం చేసుకున్న తర్వాత ఆ దేశంలో తూటాల వర్షం కురుస్తోంది. సోమవారం తెల్లవారుజామున కాబుల్ విమానాశ్రయం ఉత్తర ద్వారం వద్ద అఫ్గాన్ బలగాలు, గుర్తు తెలియని దుండగుల మధ్య కాల్పులు జరిగినట్లు జర్మనీ మిలిటరీ తెలిపింది. ఈ కాల్పుల్లో అఫ్గాన్ భద్రతా దళానికి చెందిన ఓ అధికారి ప్రాణాలు కోల్పోగా.. మరో ముగ్గురు తీవ్రంగా గాయపడినట్లు వెల్లడించింది.
విమానాశ్రయం వద్ద కాల్పులు జరిగిన క్రమంలో అమెరికా, జర్మనీ బలగాలు తిప్పికొట్టే ప్రయత్నం చేశాయని, అయితే.. జర్మనీ సైనికులకు ఎలాంటి గాయాలు కాలేదని తెలిపింది ఆ దేశ ఆర్మీ. కాల్పులు ఎవరు జరిపారనే విషయంపై ఎలాంటి స్పష్టత లేదని పేర్కొంది. కాబుల్ ఎయిర్పోర్ట్ బయట తాలిబన్లు ఉన్నప్పటికీ.. ఇప్పటి వరకు నాటో, అఫ్గాన్ దళాలపై కాల్పులు జరపలేదని తెలిపింది.
కాబుల్ విమానాశ్రయానికి(Kabul airport) ప్రజలు భారీగా వస్తున్న క్రమంలో కాల్పులు జరగగా.. తొక్కిసలాట జరిగి ఆదివారం ఏడుగురు ప్రాణాలు కోల్పోయారు. అయినప్పటికీ దేశం నుంచి పారిపోయేందుకు వేలాది మంది ఎయిర్పోర్టుకు తరలివస్తున్నారు.
ఇదీ చూడండి: Panjshir valley: 'పంజ్షేర్' తాలిబన్లకు లొంగుతుందా?
