అఫ్గాన్​లో సంగీతానికి నో ప్లేస్- దేశం వీడుతున్న కళాకారులు!

'సంగీత కచేరీలు, పాటల ప్రోగ్రామ్​లు బంద్.​. సంగీత పాఠశాలలు, సంబంధిత కార్యాలయాలు మూసివేత.. మ్యూజిక్​ అనే పదానికే స్వస్తి.. స్టోర్​ రూముల్లో సంగీత వాయిద్యాలు.. మారు వేషాల్లో కళాకారులు.. ప్రాణ భయంతో పరాయి దేశాలకు వలసలు..' ఇది అఫ్గానిస్థాన్​లోని ప్రస్తుత పరిస్థితి(Afghanistan crisis).

అఫ్గానిస్థాన్​ను తాలిబన్లు(Afghanistan Taliban) తమ అధీనంలోకి తెచ్చుకున్న క్రమంలో.. అక్కడి కళాకారుల(Afghan musicians) పరిస్థితి దారుణంగా మారింది. వారి పాలనపై భయంతో వణికిపోతున్నారు. ఈ క్రమంలోనే పాకిస్థాన్​లోని ప్రసిద్ధ అఫ్గాన్​ సంగీతకారులు.. కాబుల్​లోని తమ కార్యాలయాలను మూసివేస్తున్నారు. అక్కడి కళాకారులు ప్రాణభయంతో అజ్ఞాతంలోకి వెళ్లిపోతున్నారు. సంగీత కార్యక్రమాలు రద్దవుతున్నాయి. సంగీత పరిశ్రమ తీవ్ర నష్టాలు చవిచూస్తోంది.

సెప్టెంబర్​ 6న పంజ్​షేర్​ ప్రావిన్స్​ను(panjshir valley) సైతం తమ అధీనంలోకి తెచ్చుకున్నట్లు తాలిబన్లు ప్రకటించారు. పూర్తి అఫ్గాన్​ తమ వశమైనట్లు వెల్లడించారు. అప్పటి నుంచి సంగీత కళాకారులు తమ వాయిద్యాలను ఇంటికి తెచ్చేసుకోవటం లేదా స్టోర్​ రూముల్లో పడేయటం చేస్తున్నారు. 20 ఏళ్ల క్రితం మాదిరిగా మ్యూజిక్​పై నిషేధం విధిస్తారా? లేదా అనుమతిస్తారా? అని ఆత్రుతగా ఎదురుచూస్తున్నారు. భయంతో కొందరు గాయకులు పాకిస్థాన్​కు వలస వెళ్తున్నారు.

" కాబుల్​ను తాలిబన్లు ఆక్రమించికున్న తర్వాత.. నా వేషధారణ మార్చుకుని పెషావర్​కు వచ్చేశాను. తాలిబన్లతో మాకు ఎలాంటి శత్రుత్వం లేదు. వారిని మా సోదరులుగానే భావిస్తున్నాం. కానీ, మా వృత్తి వారికి నచ్చదు కాబట్టి వారి పాలనలో మాకు రక్షణ లేదు. "

- అజ్మల్​, గాయకుడు.

అఫ్గాన్​ సంగీతాన్ని ప్రేమించేవారు, గాయకులు, సంగీత దర్శకులు, అనుబంధ కళాకారులు.. పెషావర్​లోని తమ కార్యాలయాలను మూసివేస్తున్నారు. అఫ్గాన్​లో పరిస్థితులు వేగంగా మారుతున్న క్రమంలో తమ వ్యాపారం నష్టాల్లోకి వెళ్లిందని, దాని ఫలితంగా కోట్లాది రూపాయలు నష్టాలు వస్తున్నట్లు ఆందోళన వ్యక్తం చేస్తున్నారు. అఫ్గానిస్థాన్​లో సంగీత కార్యక్రమాలపై నిషేధం విధించటం పాకిస్థాన్​ కళాకారులపైనా తీవ్ర ప్రభావం చూపుతుందని పేర్కొన్నారు అఫ్గాన్​ కళాకారుడు గులాబ్​ అఫ్రిదీ.

ఇప్పటికే అఫ్గాన్​ను చాలా మంది సంగీత కళాకారులు, అనుబంధ రగాల వారు వీడినట్లు సమాచారం. ఇంకా అఫ్గాన్​లోనే చిక్కుకుని ఉన్న ఆర్టిస్టులు దేశాన్ని వీడి పాకిస్థాన్​ లేదా ఇతర దేశాలకు వెళ్లిపోయేందుకే చూస్తున్నారు.

కళాకారుడిపై తూటాల వర్షం..

ఇటీవల ప్రభుత్వాన్ని ఏర్పాటు చేసిన తాలిబన్లు.. సంగీత కార్యక్రమాలపై కీలక వ్యాఖ్యలు చేశారు. బహిరంగ సంగీతాన్ని ఇస్లాం నిషేధించిందని, అయితే.. గతంలో ఉన్నటువంటి భారీ ఆంక్షలు ఉండకపోవచ్చని తాలిబన్​ ప్రతినిధి జబిహుల్లా ముజాహిద్​ వెల్లడించారు. ప్రజలపై ఒత్తిడి తేబోమని, అయితే.. సంగీతం వైపు వెళ్లకుండా ఒప్పించే ప్రయత్నం చేసే అవకాశం ఉందన్నారు. ఈ ప్రకటన వెలువడిన కొన్ని రోజుల్లోనే.. బఘ్లాన్​ ప్రావిన్స్​కు చెందిన అఫ్గాన్​ జానపద కళాకారుడు​ ఫవాద్​ అందరాబిని తన ఇంట్లో నుంచి లాక్కొచ్చి తాలిబన్లు చంపేశారు. ఈ ఘటన తర్వాత.. దేశంలోని సంగీతకారుల్లో ఆందోళనలు రెట్టింపయ్యాయి.

ఇదీ చూడండి: తాలిబన్ల వింత రూల్స్: మహిళలు చదువుకోవచ్చు.. కానీ...