కుబేరుల 'రోదసి' పోరులో మరో ఘట్టం ముగిసింది. అమెజాన్ వ్యవస్థాపకుడు చేపట్టిన అంతరిక్ష యాత్ర విజయవంతమైంది. బెజోస్తో పాటు.. మొత్తం నలుగురు సభ్యుల బృందం అంతరిక్ష యాత్రను చేపట్టి తిరిగి భూమికి చేరుకుంది.
బ్రిటన్ కుబేరుడు రిచర్డ్ బ్రాన్సన్.. 9 రోజుల ముందే.. అంటే జులై 11న.. రోదసి యాత్రను చేపట్టి సంచలనం సృష్టించారు. ఈ నేపథ్యంలో ఇరువురి యాత్రకు సంబంధించిన విశేషాలను ఓసారి చూద్దాం..
బెజోస్ వర్సెస్ రిచర్డ్..
రిచర్డ్ బృందం రోదసిలో 15 నిమిషాలు గడపగా.. బెజోస్ బృందం 11 నిమిషాలు గడిపింది.
బ్లూ ఆరిజిన్ చేపట్టిన రోదసి యాత్రకు మరో ముగ్గురితో కలిసి 'న్యూ షెపర్డ్' వ్యోమనౌక ద్వారా పయనించారు జెఫ్ బెజోస్. విశ్వంలోకి వెళ్లిన అతిపెద్ద, పిన్న వయస్కులు ఈ యాత్రలో ఉండటం విశేషం.
రిచర్డ్.. ఆరుగురు సభ్యుల బృందంతో రోదసి యాత్ర చేపట్టారు.
పశ్చిమ టెక్సాస్‌ ఎడారిలోని ఓ మారుమూల ప్రాంతంలో ఉన్న లాంచ్ సైట్‌ వన్‌ నుంచి సాయంత్రం 6:30 గంటలకు(భారత కాలమానం ప్రకారం) న్యూ షెపర్డ్ దూసుకెళ్లింది.
జులై 11న సాయంత్రం 6.30 గంటలకు వర్జిన్ గెలాక్టిక్ వ్యోమనౌక యూనిటీ 22 లాంచ్ ఉంటుందని తొలుత సంస్థ పేర్కొంది. అయితే.. వాతావరణ పరిస్థితుల వల్ల గంటన్నర ఆలస్యంగా రిచర్డ్ బృందం రోదసి యాత్ర చేపట్టింది.
నిజానికి రోదసియానం చేసే ఉద్దేశం వర్జిన్ గెలాక్టిక్ సంస్థ వ్యవస్థాపకుడు రిచర్డ్ బ్రాన్సన్కు లేదు. బెజోస్ తన యాత్ర గురించి ప్రకటన చేయగానే బ్రాన్సన్ ఈ నిర్ణయం తీసుకున్నారు. వ్యాపార ప్రత్యర్థి కన్నా ముందుండేందుకు ఈ నెల 11న యాత్ర చేపట్టారు. తద్వారా.. స్వీయ వ్యోమనౌకలో రోదసిలోకి వెళ్లొచ్చిన తొలి బిలియనీరుగా ఆయన గుర్తింపు పొందారు.
ఇదీ చదవండి:బెజోస్ బృందం గర్వపడుతున్న విషయం ఇదే!
