కరోనా కోరల్లో యావత్ ప్రపంచం విలవిల్లాడుతోంది. డెల్టాకు తోడు ఒమిక్రాన్ వేరియంట్ జతకలిసి వేగంగా వ్యాప్తి చెందుతోంది. రోజుకు లక్షల మంది వైరస్ బారినపడుతున్నారు. శుక్రవారం ఒక్కరోజే 27.05 లక్షల మందికి వైరస్ సోకింది. దీంతో మొత్తం కేసులు సంఖ్య 30.36 కోట్లు దాటింది. మరో 6,380 మంది మరణించగా.. మృతుల సంఖ్య 54.96 లక్షలకు చేరింది.
ప్రపంచవ్యాప్తంగా నమోదవుతున్న కేసుల్లో 30 శాతానికిపైగా అమెరికాలోనే నమోదవుతున్నాయి. శుక్రవారం 8.49 లక్షల మందికి వైరస్ సోకింది. మరో 2,025 మంది ప్రాణాలు కోల్పోయారు. అగ్రరాజ్యంలో మొత్తం కేసుల సంఖ్య 6,04,64,426కు చేరింది. ఇప్పటి వరకు 8,58,346 మంది మరణించారు.
వ్యాక్సినేషన్ వేగంగా కొనసాగుతున్నప్పటికీ వైరస్ బారినపడుతున్నవారి సంఖ్య గణనీయంగా పెరుగుతుండటం ఆందోళన కలిగిస్తోంది. రోజు రోజుకు ఆసుపత్రుల్లో చేరుతున్నవారి సంఖ్య పెరుగుతోంది. మొత్తం కేసుల్లో 95 శాతం ఒమిక్రాన్ వేరియంట్వే ఉండటం గమనార్హం. ఆసుపత్రుల్లో లక్షకుపైగా పౌరులు చికిత్స పొందుతున్నట్లు పలు నివేదికలు చెబుతున్నాయి. దీంతో పలు రాష్ట్రాలు ఆంక్షలు విధిస్తున్నాయి. ఇప్పటికే పలు పాఠశాలలు మూతపడ్డాయి.
కొవిడ్ అధికంగా ఉన్న మరిన్ని దేశాలు..
- ఐరోపాలోని పలు దేశాల్లో కొవిడ్ ఉద్ధృతి తీవ్రంగా ఉంది. ఒమిక్రాన్ సహా మరో కొత్త వేరియంట్ ఫ్రాన్స్ను కలవరపరుస్తోంది. శుక్రవారం ఒక్కరోజే 3,28,214 కేసులు నమోదయ్యాయి. 193 మంది ప్రాణాలు కోల్పోయారు. మొత్తం మరణాలు 1,25,206, కేసులు 11,511,452కు చేరాయి.
- బ్రిటన్లోనూ కరోనా విజృంభణ కొనసాగుతోంది. కొత్తగా 1,78,250 కేసులు వెలుగుచూశాయి. 229 మంది ప్రాణాలు కోల్పోయారు. ఒమిక్రాన్ వేరియంట్ కారణంగానే కేసుల సంఖ్య పెరుగుతోందని అధికారులు తెలిపారు. మొత్తం కేసుల సంఖ్య 14,193,228కి చేరింది.
- స్పెయిన్లో వైరస్ ఒక్కసారిగా ఉగ్రరూపం దాల్చటం ఆందోళన కలిగిస్తోంది. శుక్రవారం ఒక్కరోజే 1,15,900 మంది కరోనా సోకింది. 15 మంది చనిపోయారు.
- అర్జెంటీనాలో శుక్రవారం కొత్తగా 1,10,533 మందికి వైరస్ సోకింది. 223 మంది మరణించారు. 27,582 మంది కోలుకున్నారు.
- ఇటలీలో కొత్తగా 1,08,304 కేసులు బయటపడ్డాయి. 223 మంది వైరస్ ధాటికి మృతి చెందారు.
ఇదీ చూడండి: కరోనా కల్లోలం- 71 శాతం పెరిగిన కేసులు
