ప్రపంచంపై కరోనా రక్కసి కోరలు చాస్తోంది. ప్రపంచవ్యాప్తంగా ఇప్పటివరకు 4కోట్ల 47లక్షల మందికిపైగా వైరస్ బారిన పడ్డారు. వారిలో 11లక్షల 78వేల మందికిపైగా ప్రాణాలు కోల్పోయారు. కొవిడ్ బారినపడిన వారిలో 3కోట్ల 27లక్షల మంది కోలుకున్నారు. 1.08 కోట్ల యాక్టివ్ కేసులు నమోదయ్యాయి.
- కరోనా కేసుల పరంగా తొలి స్థానంలో ఉన్న అమెరికాలో బుధవారం ఒక్కరోజే 81,581 మందికి వైరస్ సోకింది. బాధితుల సంఖ్య 91లక్షల 20వేల 751కి చేరింది.
- బ్రెజిల్లో వైరస్ ఉద్ధృతి ఏమాత్రం తగ్గడం లేదు. మరో 28వేలకుపైగా పాజిటివ్ కేసులు నమోదయ్యాయి. మొత్తం బాధితుల సంఖ్య 54లక్షల 69వేలు దాటింది.
- దక్షిణాఫ్రికాలోనూ వైరస్ విజృంభణ కొనసాగుతోంది. మరో 1,863 కొవిడ్ కేసులు వెలుగుచూడగా.. బాధితుల సంఖ్య 7.19 లక్షలకు ఎగబాకింది. ఆ దేశంలో ఇప్పటివరకు 19,111 మంది కరోనాతో మృతిచెందారు. దక్షిణాఫ్రికాలో కొవిడ్ వ్యాప్తి నేపథ్యంలో ఆ అధ్యక్షుడు సిరిల్ రమఫొసా స్వీయ నిర్బంధంలోకి వెళ్తున్నట్టు ప్రకటించారు. జొహెన్స్బర్గ్లో ఇటీవల జరిగిన ఓ విందు కార్యక్రమంలో పాల్గొన్న ఆయన.. అక్కడ 35 మందిని కలిశారు. వారికి వైరస్ సోకడం వల్లే.. తాను కూడా నిర్బంధంలోకి వెళ్తున్నట్టు చెప్పారు రమఫొసా.
- బ్రిటన్లో ఒక్కరోజులోనే 24,701 మందికి కొవిడ్ పాజిటివ్గా నిర్ధరణ అయింది. కేసుల సంఖ్య 9లక్షల 42వేల 275కు ఎగబాకింది.
- కెనడాలో కరోనా కేసుల సంఖ్య 2.24 లక్షలు దాటింది. ఇప్పటివరకు అక్కడ 10,026 మంది వైరస్కు బలయ్యారు.
- ఇరాన్లో బుధవారం ఒక్కరోజే 6వేలకుపైగా కరోనా కేసులు బయటపడ్డాయి. బాధితుల సంఖ్య 5.88 లక్షలు దాటింది. మరో 415 మంది మృతితో.. మరణాల సంఖ్య 33,714కు పెరిగింది.
ఇదీ చదవండి- కటకటాల్లోకి సెక్స్ గురు- 120 ఏళ్ల జైలు
