జూన్ 3న ప్రపంచ సైకిల్ దినోత్సవాన్ని జరుపుకుంటారని మీకు తెలుసా? మొట్టమొదటి సారిగా 2018 జూన్ 3న (ఆదివారం) ఐక్యరాజ్యసమితి.. న్యూయార్క్లోని ఐరాస జనరల్ అసెంబ్లీ వేదికగా ఈ సైకిల్ డేని నిర్వహించింది.
ఎందుకు నిర్వహించాలి..?
సైకిల్ వాడకంతో కలిగే లాభాలపై ప్రచారం చేయడమే ఈ దినోత్సవం ముఖ్య ఉద్దేశం. నడక, సైక్లింగ్ సంపూర్ణ ఆరోగ్యానికి దోహదం చేస్తాయని ప్రపంచ ఆరోగ్య సంస్థ(డబ్ల్యూహెచ్ఓ) నివేదించింది. ఇంకా సైకిల్ వాడకంతో గుండె సంబంధిత వ్యాధులు, మధుమేహం, క్యాన్సర్ వచ్చే అవకాశాలు తక్కువ. మొత్తంగా ఆయుష్షు పెంచుకోవచ్చట.
ప్రాముఖ్యం, లక్ష్యాలు...
రహదారి భద్రతను మెరుగుపరచడానికి సభ్యదేశాలను ప్రోత్సహించ‌ట‌మే కాక, పాదచారుల భద్రతను కాపాడటానికి సైకిల్ వాడ‌కాన్ని ప్రోత్సహిస్తోంది ఐరాస.
జాతీయ స్థాయిలో ప్రచారం కల్పించడం, సైక్లింగ్ సంస్కృతిని మరోస్థాయికి తీసుకెళ్లేలా కొత్త కొత్త విధానాలు, ఉత్తమ పద్ధతులతో ముందుకొచ్చేలా ఐరాస.. సభ్యదేశాల్ని ప్రోత్సహిస్తోంది.
సైకిల్ వల్ల ప్రయోజనాలు...
సైకిల్ తొక్కితే శారీరక ఉత్సాహంతో పాటు మానసిక ఉల్లాసం కలుగుతుంది. మోటారు వాహనాలు వినియోగించిన వాళ్ల జీవిత కాలం.. 60-70 ఏళ్లు కాగా.. సైకిల్ తొక్కేవారు 80-90 ఏళ్ల వరకు జీవించే అవకాశాలున్నాయని వైద్యులు చెబుతున్నారు.
- సైకిల్ సరళమైన, సరసమైన, నమ్మదగిన, పర్యావరణ అనుకూల రవాణా మార్గంగా చెప్పవచ్చు. సైకిల్.. అభివృద్ధికి ఒక సాధనంగా, విద్య, ఆరోగ్య సంరక్షణను ప్రోత్సహించడానికి ఉపయోగపడుతుంది.
- శారీరకంగా దృఢంగా ఉండేందుకు, వ్యాధుల బారి నుంచి రక్షణకు.. సైకిల్ తొక్కడం మంచిదట.
- సైకిల్... రవాణాకు ఉప‌యోగక‌ర‌మే కాకుండా, ఇంధన ఆదాకు ఉప‌యుక్త‌మైన‌ది.
- ఇంధన వనరుల దిగుమతి తగ్గించుకొని.. ఆర్థిక భారం నుంచి విముక్తి పొందవచ్చు.సైకిల్తో ప్రయోజనాలెన్నో!
శారీరక ప్రయోజనాలు...
- గుండె సంబంధిత వ్యాధుల ప్రమాదం తక్కువ.
- మధుమేహం దూరం.
- కంటి నిండా నిద్ర ఉంటుంది.
- కళ్లు, మెదడు చురుగ్గా పనిచేస్తాయి.
- బరువు తగ్గొచ్చు.
- లైంగిక ఆరోగ్యానికి మంచిది.
- ఎముకల్లో పటుత్వం వస్తుంది.
- కండరాలు దృఢత్వం సంతరించుకుంటాయి.
