కరోనాతో భారత్ సతమతం అవుతున్న వేళ.. తమ సమీకృత సప్లైచైన్ ద్వారా సాయం చేసేందుకు సిద్ధంగా ఉన్నామని ఐక్యరాజ్యసమితి ప్రకటించింది. ఈ మేరకు.. యూఎన్ సెక్రెటరీ జనరల్ ఆంటోనియో గుటెరస్ తెలిపారు.
భారత్‌లో పరిస్థితిపై ఎప్పటికప్పుడు ఐరాసలో భారత శాశ్వత ప్రతినిధి తిరుమూర్తి నుంచి సమాచారం తెలుసుకుంటున్నట్లు గుటెరస్ అధికార ప్రతినిధి ఫర్హాన్ హాగ్ చెప్పారు. భారత్‌లో పనిచేసే.. యూఎన్‌కు చెందిన అంతర్జాతీయ సిబ్బంది లేదా భారతీయ సిబ్బంది కరోనా బారిన పడకుండా.. అన్ని జాగ్రత్తలూ తీసుకుంటున్నట్లు తెలిపారు. అయితే ఇప్పటి వరకు తమ నుంచి ఏ విధమైన సాయం భారత్కు అందలేదని.. భారత్ కోరుకుంటే మాత్రం సిద్ధంగా ఉన్నామని యూఎన్ తెలిపింది.
మహమ్మారి కట్టడిలో సహకరించేందుకు ఐరాస నుంచి.. సిబ్బందిని పంపేందుకు కూడా సిద్ధంగా ఉన్నామని వెల్లడించింది. ఇప్పటికే.. భారత్‌లో ఉన్న యూఎన్ సిబ్బంది ఆ మేరకు సహకరిస్తున్నారని కూడా హాగ్ వివరించారు.
ఇవీ చదవండి: భారత్కు సాయం ప్రకటించిన పాక్‌!
బైడెన్కు మోదీ ఫోన్- కొవిడ్పై చర్చ
