జో బైడెన్ను అధికారికంగా అమెరికా అధ్యక్షుడిగా ఎలక్టోరల్ కాలేజీ ఎన్నుకున్నప్పటికీ.. ఆ దేశాధ్యక్షుడు డొనాల్డ్ ట్రంప్ మాత్రం పట్టువీడటం లేదు. అధ్యక్ష ఎన్నికల్లో అవకతవకలు జరిగాయంటూ ఇప్పటికీ వాదిస్తూనే ఉన్న ట్రంప్ యంత్రాంగం.. తాజాగా అగ్రరాజ్య సుప్రీంకోర్టులో మరో వ్యాజ్యం దాఖలు చేసింది. పెన్సిల్వేనియాలోని మెయిల్-ఇన్ బ్యాలెట్లపై గతంలో సుప్రీంకోర్టు ఇచ్చిన తీర్పును మార్చాలని ఈ తాజా వ్యాజ్యంలో కోరింది. ప్రజల నిర్ణయాన్ని తిరస్కరించి.. ఎలక్టోరళ్ల ఎంపిక బాధ్యతను ఆ రాష్ట్ర అసెంబ్లీకి అప్పగించాలని పేర్కొంది.
అయితే ఈ వ్యాజ్యంపై సుప్రీంకోర్టు సంచలన తీర్పులు ఇవ్వడం దాదాపు అసాధ్యం. అదే సమయంలో ఒక వేళ పెన్సిల్వేనియా ట్రంప్కు దక్కినా.. అధ్యక్ష పీఠాన్ని పొందేందుకు సరిపడా గణాంకాలు బైడెన్ వద్ద ఇంకా ఉంటాయి.
ఎలక్టోరల్ కాలేజీ ఓట్లను లెక్కించేందుకు జనవరి 6న అమెరికా కాంగ్రెస్ సమావేశం కానుంది. ఈలోపే చర్యలు చేపట్టాలని ట్రంప్ అటార్నీ రూడీ గియులియాని సుప్రీంకోర్టును అభ్యర్థించారు. అయితే ఇది కూడా జరిగే పనిలా కనిపించడం లేదు. ఈ కేసు విచారణ జనవరి 8న జరిగే అవకాశముంది.
కోర్టుల్లో ఎన్ని ఎదురుదెబ్బలు తగిలినా.. ట్రంప్ మాత్రం వెనకడుగు వేయడం లేదు. తన వ్యాజ్యాలు తిరస్కరణకు గురవుతున్నా.. మళ్లీ కొత్తవి వేస్తూనే ఉన్నారు. ఇలా ట్రంప్.. ఎన్నికల్లో అవకతవకలు జరిగాయంటూ.. ఇప్పటివరకు 50కుపైగా పిటిషన్లు వేశారు.
ఇదీ చూడండి : 'ట్రంప్ న్యాయపోరాటం కొనసాగుతూనే ఉంది'
