ఒకే ఒక్క కరోనా కేసు వెలుగుచూడగా.. కఠిన చర్యలు తీసుకుంది న్యూజిలాండ్ ప్రభుత్వం. దేశవ్యాప్తంగా 3 రోజుల పాటు లాక్డౌన్ విధిస్తున్నట్లు ప్రధాని జెసిండా ఆర్డెర్న్ మంగళవారం ప్రకటించారు. మహమ్మారిని అంతం చేయకపోతే జరిగే నష్టం భరించలేమని, కాబట్టి దానిని అదుపు చేయడానికి 50 లక్షల దేశ జనాభా కలిసికట్టుగా పోరాడాలని ఆమె పిలుపునిచ్చారు.
రోగి నివసించే ఆక్లాండ్, అతడు పర్యటించిన కోరమండల్లో 7 రోజులు, దేశంలోని ఇతర ప్రాంతాల్లో 3 రోజుల పాటు పూర్తి లాక్డౌన్ ఉంటుందని జెసిండా తెలిపారు. ఈ ప్రకటనతో నిత్యావసరాల దుకాణాల వద్ద ప్రజలు లైన్లు కట్టారు. మరోవైపు అంతర్జాతీయ మార్కెట్లో న్యూజిలాండ్ డాలర్ విలువ పడిపోయింది.
బూస్టర్ డోసు తప్పదా?
ఇక వయసుతో నిమిత్తం లేకుండా రెండో డోసు టీకా పూర్తయిన 8 నెలల తర్వాత అమెరికన్లు బూస్టర్ డోసు తీసుకోవాలని యూఎస్ నిపుణులు సూచించే అవకాశం ఉంది. దేశంలో డెల్టా విజృంభణ, ఇజ్రాయెల్ లాంటి దేశాల్లో టీకా ప్రభావం తగ్గిపోవడం లాంటి అధ్యయనాలను సమీక్షించిన అనంతరం ఈ నిర్ణయం తీసుకున్నట్లు తెలుస్తోంది.
క్వారంటైన్ గడువు పొడిగింపు..
అమెరికా సహా మరో 15 దేశాల నుంచి వచ్చే ప్రయాణికులకు విధించే క్వారంటైన్ గడువును 21 రోజులకు పెంచింది హాంకాంగ్. ఇదివరకు మీడియం రిస్క్ విభాగంలో ఉన్న మలేసియా, థాయ్లాండ్, ఫ్రాన్స్ సహా 15 దేశాల్లో కేసులు మరోసారి పెరుగుతున్న నేపథ్యంలో వాటిని తీవ్ర రిస్క్ విభాగంలో చేర్చింది.
ఇదివరకు మీడియం రిస్క్ విభాగంలో ఉన్న దేశాలకు 7 రోజుల క్వారంటైన్ నిబంధన ఉండగా దానిని 14 రోజులకు పెంచింది హాంకాంగ్. కాగా, లో రిస్క్లో ఉన్న ఏకైక దేశం న్యూజిలాండ్కు 7 రోజుల క్వారంటైన్ గడువు కొనసాగుతోంది.
ఇదీ చూడండి: 5 నెలల కనిష్ఠానికి కరోనా కేసులు- వ్యాక్సినేషన్లో కొత్త రికార్డు
