వ్యాపార దిగ్గజం, మైక్రోసాఫ్ట్ సహవ్యవస్థాపకుడు బిల్ గేట్స్.. 2008లో ఓ మహిళా ఉద్యోగిని ఫ్లర్ట్ చేసేవారు. ఆమెకు ఈమెయిల్స్ పంపేవారు. ఆయన్ని మైక్రోసాఫ్ట్ ఓ సందర్భంలో హెచ్చరించింది కూడా. ఇప్పుడు ఈ విషయాన్ని సంస్థ స్వయంగా వెల్లడించిందని అమెరికాకు చెందిన వాల్ స్ట్రీట్ జర్నల్ ఓ కథనాన్ని ప్రచురించింది.
ప్రస్తుత మైక్రోసాఫ్ట్ అధ్యక్షుడు, వైస్ ఛైర్మన్ బ్రాడ్ స్మిత్.. మరో అధికారితో కలిసి ఈ విషయంపై గేట్స్ను అప్పట్లో కలిశారని పత్రిక పేర్కొంది. ఈమెయిల్స్పై వారు ఆరా తీసినట్టు వెల్లడించింది.
ఈ వ్యవహారాన్ని గేట్స్ కొట్టిపారేయలేదని, అయితే ఆ మహిళా ఉద్యోగి- వ్యాపార దిగ్గజం మధ్య ఎలాంటి లైంగిక బంధం లేకపోవడం వల్ల సంస్థ ఆయనపై చర్యలు తీసుకోలేదని వార్తాపత్రిక తెలిపింది.
ఈ కథనంపై మరిన్ని వివరాలు వెల్లడించేందుకు సంస్థ నిరాకరించింది. అయితే వాల్ స్ట్రీట్ ప్రచురించింది మాత్రం నిజమేనని సంస్థ అంగీకరించింది. అటు బ్రాడ్ స్మిత్ కార్యాలయం ఎటువంటి ప్రకటన చేయలేదు.
అయితే బిల్ గేట్స్ వ్యక్తిగత కార్యాలయం మాత్రం దీనిని తీవ్రంగా ఖండించింది. 'అసలు ఏం జరిగిందో తెలియని వారు, విషయంపై సరైన అవగాహన లేని వారి నుంచి ఈ ఊహాగానాలు వెలువడ్డాయి. వాటిల్లో ఏ మాత్రం నిజం లేదు,' అని ఓ ప్రకటనను విడుదల చేసింది.
పాల్ ఆలెన్తో కలిసి 1975లో కంపెనీని స్థాపించారు బిల్ గేట్స్. 2000వరకు సీఈఓగా పనిచేశారు. 2008 తర్వాత కంపెనీకి సంబంధించిన రోజువారీ కార్యకలాపాల నుంచి నెమ్మదిగా తప్పుకున్నారు. 2014 వరకు కంపెనీ ఛైర్మన్గా వ్యవహరించారు.
పూర్తిస్థాయి ఉద్యోగి బాధ్యతల నుంచి గేట్స్ తప్పుకుంటున్న రోజుల్లో ఈ ఘటన జరిగినట్టు మైక్రోసాఫ్ట్ ప్రతినిధి ఫ్రాంక్ షా తెలిపారు. మహిళా ఉద్యోగితో గేట్స్ ఫ్లర్ట్ చేస్తూ ఈమెయిల్స్ పంపేవారని, ఆఫీసు బయట కలుద్దామని అడిగేవారని షా పేర్కొన్నారు.
కొత్తేమీ కాదు...!
బిల్ గేట్స్పై ఇలాంటి ఆరోపణలు రావడం ఇది కొత్తేమీ కాదు. గేట్స్తో తనకు ఎన్నో ఏళ్లుగా.. లైంగిక సంబంధం ఉందని 2019లో ఓ ఇంజినీర్ సంచలన లేఖ రాసింది. దానిపై సంస్థ 2021లో దర్యాప్తు చేపట్టింది.
వాటాదురుల ఆందోళన!
మైక్రోసాఫ్ట్లో పరిస్థితులపై ఆందోళన వ్యక్తం చేస్తూ అర్జున క్యాపిటల్ ఇన్వెస్టర్ సంస్థ.. వాటాదారుల మద్దతు కూడగట్టేందుకు ప్రయత్నిస్తోంది. పనిప్రదేశాల్లో జరుగుతున్న హింసపై నివేదికలు బయటపెట్టి, చర్యలు తీసుకోవాలన్న ప్రతిపాదనను ముందుకు తీసుకొచ్చింది. వచ్చే నెలలో జరగనున్న షేర్హోల్డర్ల వార్షిక సమావేశంలో ఈ ప్రతిపాదనపై చర్చ జరగనున్నట్టు సమాచారం.
అయితే ఈ ప్రతిపాదనను వాటాదారులు తిరస్కరించాలని మైక్రోసాఫ్ట్ అభ్యర్థించింది. పనిప్రదేశాల్లో జరిగే వ్యవహారాలను బహిరంగంగా వెల్లడించేందుకు తాము ఇప్పటికే చర్యలు తీసుకుంటున్నట్టు, అందువల్ల కొత్త విధానాలేవీ అవసరం లేనట్టు వెల్లడించింది.
ఇదీ చూడండి:- బిల్గేట్స్ జీవితంలో చీకటి కోణం... అందుకే అలా...
