అమెరికా అధ్యక్షుడు డొనాల్డ్ ట్రంప్పై అరెస్ట్ వారెంట్ జారీ చేసింది ఇరాన్. తమ దేశానికి చెందిన కీలక సైనికాధిపతి ఖాసీం సులేమానీని వైమానిక దాడిలో అమెరికా హతమార్చిందంటూ ట్రంప్ సహా మరో 30మందిపై ఈ చర్యలు చేపట్టింది. అధ్యక్షుడిని అదుపులోకి తీసుకునేందుకు సహాయం చేయాలని ఇంటర్పోల్ను కూడా ఆశ్రయించింది.
ఈ అరెస్ట్ వారెంట్తో ట్రంప్కు ఎలాంటి ముప్పు లేనప్పటికీ... అమెరికా-ఇరాన్ మధ్య ఉద్రిక్తతలు మళ్లీ పెరిగే అవకాశముందని నిపుణులు భావిస్తున్నారు.
అగ్రరాజ్య అధ్యక్షుడిపై హత్య, ఉగ్రవాద ఛార్జీలు మోపినట్టు ఇరాన్ ప్రాసిక్యూటర్ అలి అల్ఖసిమెహ్ర తెలిపారు. అధ్యక్షుడిగా తన పదవీ కాలం ముగిసిన తర్వాత కూడా ట్రంప్పై విచారణ కొనసాగుతుందని పేర్కొన్నారు.
ఈ పూర్తి వ్యవహారంపై ఇంటర్పోల్ ఇంకా అధికారికంగా స్పందించలేదు. ఈ సమాచారాన్ని సభ్య దేశాలతో పంచుకోవాలా? వద్దా? అనే విషయంపై చర్చలు జరిపి ఓ నిర్ణయం తీసుకుంటుంది ఇంటర్పోల్. అయితే రాజకీయాలకు సంబంధించిన కార్యకలాపాల్లో ఇంటర్పోల్ జోక్యం చేసుకోదు. అందుకే ఈ వ్యవహారంపై ఇంటర్పోల్ ఎలాంటి సంచలనాత్మక చర్యలు చేపట్టే అవకాశాలు లేవు.
ఈ ఏడాది జనవరిలో.. ఇరాక్ రాజధాని బాగ్దాద్ అంతర్జాతీయ విమానాశ్రయానికి సమీపంలో రాకెట్ దాడి జరిపింది అమెరికా. ఈ దాడిలో ఇరాన్ రెవల్యూషనరీ గార్డ్స్ కమాండర్ ఖాసీం సులేమానీని మట్టుబెట్టినట్టు ప్రకటించింది. ఈ విషయాన్ని ధ్రువీకరించిన ఇరాన్.. ప్రతీకార చర్యలకు సిద్ధంగా ఉండాలని అమెరికాను హెచ్చరించింది.
