Parineeti Chopra Raghav Chadha Wedding : బాలీవుడ్ నటి పరిణీతి చోప్రా, ఆమ్ ఆద్మీ ఎంపీ రాఘవ్ చద్దా మూడు ముళ్లు బంధంతో ఒక్కటయ్యారు. ఉదయ్పుర్లోని లీలా ప్యాలెస్ వేదికగా ఈ పెళ్లి అట్టాహాసంగా జరిగింది. ఈ స్టార్ కపుల్ వివాహ వేడుకలకు పలువురు క్రీడా, సినీ, రాజకీయ ప్రముఖులు హాజరయ్యారు. అయితే వేడుకల్లో అమలైన నో ఫోన్ పాలసీ కారణంగా పెళ్లి ఫొటోలు ఆలస్యంగా బయటకు వచ్చాయి. అయితే తాజాగా ఆ ఫొటోలను పరిణీతి తన ఇన్స్టాగ్రామ్ అకౌంట్లో షేర్ చేశారు. ఇక ఆ పోస్ట్ కింద కామెంట్ల రూపంలో కొత్త జంటకు శుభాకాంక్షలు తెలుపుతున్న ఫ్యాన్స్ వాటిని నెట్టింట ట్రెండ్ చేస్తున్నారు.
ఈ క్రమంలో పెళ్లి ఫొటోలతో పాటు ఓ వీడియో తెగ వైరల్ అవుతోంది. అందులో ఈ క్యూట్ జంట చేస్తున్న హంగామా అంతా ఇంతా కాదు. ఓ గొడుగు కింద ఈ ఇద్దరూ నడుచుకుంటూ వెళ్తుండగా.. పరిణితీ డ్యాన్స్ చేస్తూ సందడి చేసింది. దీన్ని చూసిన ఫ్యాన్స్ పరిణీతి ఎంతో క్యూట్గా ఉన్నారంటూ కామెంట్లు పెడుతున్నారు. దీనితో పాటు కొన్ని వీడియోలు కూడా తెగ ట్రెండ్ అవుతున్నాయి.
రాఘవ్ గ్రాండ్ ఎంట్రీ.. పెళ్లిలో స్పెషల్ డిషెస్..
వరుడిగా ముస్తాబైన రాఘవ్ చద్దా ఆదివారం మధ్యాహ్నం 2 గంటల సమయంలో ఉదయ్పుర్లోని లీలా ప్యాలస్ నుంచి తాజ్ లేక్ ప్యాలస్ వరకు బంధుమిత్రులతో కలిసి 18 పడవలలో వెళ్లారు. ఆ తర్వాత లీలా ప్యాలెస్కు చేరుకున్న రాఘవ్, అతిథులకు.. పరిణీతి చోప్రా కుటుంబం శీతల పానియాలు, డ్రైఫ్రూట్స్, స్వీట్స్ ఇచ్చి ఘనంగా స్వాగతం పలికింది. ఆ తర్వాత సాయంత్రం 6.30 గంటల సమయంలో లీలా ప్యాలెస్లోని పెళ్లి మండపంలో వేద మంత్రాల సాక్షిగా కుటుంబ సభ్యులు, బంధుమిత్రుల సమక్షంలో పరిణీతి-రాఘవ్ ఒక్కటయ్యారు.
ఇక వివాహానికి వచ్చిన అతిథులకు వివిధ రాష్ట్రాల వంటలు రుచి చూపించారు. ప్రత్యేకంగా రాజస్థాన్, పంజాబ్ వంటలతో సహా ఇటాలియన్, ఫ్రెంచ్ డిషెస్ కూడా వడ్డించారు. ఆదివారం రాత్రి 8 గంటల తర్వాత గ్రాండ్ రిసెప్షన్ ఏర్పాటు చేశారు. ఇక వివాహ వేడుకల కోసం శుక్రవారమే ఈ జంట ఉదయ్పుర్కు వచ్చింది. వీరి తర్వాత ఇరు కుటుంబ సభ్యులు, సన్నిహితులు అక్కడికి చేరుకున్నారు. శనివారం ప్రీ వెడ్డింగ్ సెలబ్రేషన్స్‌ జరిగాయి. హల్దీ, సంగీత్ వేడుకలు ఘనంగా జరిగాయి.
Parineeti Chopra Raghav Chadha Wedding Pics : రాయల్ లుక్లో కొత్త జంట.. పెళ్లి ఫొటోలు అదిరిపోయాయి!
గ్రాండ్గా పరణీతి చోప్రా, రాఘవ్ చద్ధా ఎంగేజ్మెంట్.. ఫొటోలు చూశారా!
