Attack on AE in karepally: విద్యుత్ అధికారుల నిర్లక్ష్యం మూలంగానే కాంట్రాక్టు ఉద్యోగి వీరన్న చనిపోయాడని బంధువులు ఆగ్రహం వ్యక్తం చేశారు. ఆవేశంతో విద్యుత్ శాఖ ఏఈ విజయ్పై మూకుమ్మడిగా దాడి చేశారు. దీంతో విద్యుత్ శాఖ ఏఈ ప్రాణభయంతో పరుగులు తీశాడు. ఎలాగోలా చివరికి వారి నుంచి తప్పించుకొని పారిపోయాడు. ఈ ఘటన ఖమ్మం జిల్లా కారేపల్లి ప్రభుత్వ ఆస్పత్రి వద్ద చోటు చేసుకుంది. ఈ ఘటనతో ప్రభుత్వ వైద్యశాల ప్రాంగణం ఒక్కసారిగా ఉద్రిక్తంగా మారింది. మృతుని కుటుంబానికి న్యాయం చేయాలని అధికారులను డిమాండ్ చేశారు.
అసలేం జరిగిందంటే: గుంపెళ్ల గూడెంకు జర్పుల వీరన్న (30) కారేపల్లి ప్రభుత్వ ఆస్పత్రి పక్కన మరమ్మతులు చేస్తుండగా విద్యుదాఘాతంతో మృతి చెందాడు. స్తంభంపై ఉండగానే విద్యుత్ ప్రసరించడంతో ఒక్కసారిగా కింద పడిపోయాడు. పరిస్థితి విషమించడంతో హుటాహుటిన ప్రభుత్వ వైద్యశాలకు తీసుకువెళ్లారు. వీరన్నను పరీక్షించిన వైద్యులు మృతి చెందినట్లు ప్రకటించారు. విద్యుదాఘాతానికి గురైన వీరన్నను బతికించేందుకు వైద్యసిబ్బంది శతవిధాలా ప్రయత్నించినప్పటికీ ఎలాంటి లాభం లేకుండా పోయింది. యువకుడి మృతితో కుటుంబసభ్యులు, బంధుమిత్రులు శోక సముద్రంలో మునిగిపోయారు.
బంధువుల ఆందోళన: విద్యుత్ అధికారుల నిర్లక్ష్యం మూలంగానే వీరన్న చనిపోయాడని బంధువులు ఆరోపించారు. మృతునికి భార్య ఇద్దరు పిల్లలు ఉన్నారని బాధిత కుటుంబానికి న్యాయం చేయాలని డిమాండ్ చేశారు. కారేపల్లి ప్రభుత్వ వైద్యశాల నుంచి మృతదేహాన్ని 5 కిలోమీటర్ల దూరంలో ఉన్న కారేపల్లి అడ్డరోడ్డు వద్దకు తీసుకువచ్చి ఆందోళనకు దిగారు. వారి ఆందోళనతో రోడ్డుకు ఇరువైపులా భారీగా వాహనాలు నిలిచిపోయాయి.
ఇవీ చూడండి: 'ఖబడ్దార్ కేటీఆర్.. నువ్వు ఎవరితో పెట్టుకుంటున్నావో తెలుస్తోందా..?'
మృత్యువులోనూ వీడని అనుబంధం.. అన్న మరణవార్త విని తమ్ముడు కూడా...
