Case On Actor Naresh Wife : టాలీవుడ్ సీనియర్ నటుడు నరేశ్ భార్య.. రమ్య రఘుపతిపై గచ్చిబౌలి పోలీస్ స్టేషన్లో కేసు నమోదైంది. నరేశ్ కుటుంబ ఆస్తులను చూపి.. పలువురి వద్ద నుంచి డబ్బులు వసూలు చేసినట్లు ఆమెపై పలువురు మహిళలు పోలీసులకు ఫిర్యాదు చేశారు. తమ వద్ద నుంచి సుమారు రూ.50లక్షలు మోసం చేసినట్లు ఆరోపించారు.
నగదు ఆరోపణలపై స్పందించిన నరేశ్.. డబ్బు విషయంలో తనకేమీ సంబంధం లేదని స్పష్టం చేశారు. హీరో నరేశ్కు రమ్య రఘుపతితో 8ఏళ్ల క్రితం వివాహమైంది. అయితే గత కొన్నేళ్లుగా వేరువేరుగా ఉంటున్నారు.
ఇదీ జరిగింది...
'నటుడు నరేశ్ భార్య రమ్య రఘుపతిపై మూడురోజుల క్రితం గచ్చిబౌలి పోలీస్ స్టేషన్లో ఐదుగురు వేరువేరుగా ఫిర్యాదు చేశారు. 2019లో రమ్య రఘుపతి మధ్యవర్తుల ద్వారా వారికి పరిచయమై.. లోన్ అగ్రిమెంట్ కింద 20 శాతం వడ్డీతో చెల్లిస్తానని చెప్పి వారి నుంచి డబ్బులు తీసుకున్నారు. వారి వద్ద డబ్బులు లేకపోతే వారి పేరుపై వ్యక్తిగత రుణాలు తీసుకుని ఆ మొత్తాన్ని తీసుకున్నారు. ఇలా ఒక్కొక్కరి నుంచి రూ.2లక్షల నుంచి 20 లక్షల వరకు లోన్ అగ్రిమెంట్గా తీసుకున్నారు. అలా తీసుకున్న మొత్తంలో ఇప్పటి వరకు సుమారుగా 50శాతం వరకు వడ్డీతో చెల్లించారు. మిగితా మొత్తానికి సంబంధించి చెక్కులు ఇవ్వగా.. అవి బౌన్స్ కావడంతో బాధితులు పోలీసులకు ఫిర్యాదు చేశారు. ప్రస్తుతం మొత్తం రూ.41లక్షలు బాకీ ఉన్నట్లు ఫిర్యాదులో పేర్కొన్నారు. వారి ఫిర్యాదుపై దర్యాప్తు చేపడుతున్నాం.' -సురేశ్, గచ్చిబౌలి సీఐ
ఇదీ చూడండి : ఎలక్ట్రిక్‌ బస్సుకు ఛార్జింగ్ పెడుతుండగా చెలరేగిన మంటలు.. దగ్ధం
