కరోనా మహమ్మారి నుంచి మనల్ని మనమే రక్షించుకోవాలని రాష్ట్ర అటవీ శాఖ మంత్రి ఇంద్రకరణ్రెడ్డి అన్నారు. ప్రస్తుతం స్వీయ జాగ్రత్తలే శ్రీరామ రక్ష అని పేర్కొన్నారు. అటవీ శాఖలో అధికారులు, ఉద్యోగులు, సిబ్బంది తాజా పరిస్థితిపై ఆరా తీశారు. కొవిడ్ జాగ్రత్తలు పాటించడంపై అటవీ సంరక్షణ ప్రధాన అధికారి (పీసీసీఎఫ్) ఆర్.శోభ నుంచి వివరాలు అడిగి తెలుసుకున్నారు. ఎలాంటి అజాగ్రత్తలకు చోటివ్వకుండా కరోనా నియమాలను పాటించాలని సూచించారు.
మంత్రి ఇంద్రకరణ్రెడ్డి సూచనల మేరకు అరణ్య భవన్లో ప్రత్యేకంగా కొవిడ్ వాక్సినేషన్ సెంటర్ను ప్రారంభించినట్లు పీసీసీఎఫ్ వెల్లడించారు. ప్రతీ ఉద్యోగి వాక్సిన్ వేసుకునేలా చర్యలు తీసుకుంటామన్నారు. వైద్యారోగ్య శాఖ సమన్వయంతో.. అన్ని జిల్లాల్లో క్షేత్ర స్థాయి సిబ్బందికి వాక్సిన్ ఇస్తున్నట్లు పేర్కొన్నారు.
అరణ్య భవన్లో ఏర్పాటు చేసిన వాక్సినేషన్ కేంద్రంలో టీకా పంపిణీని స్వయంగా పర్యవేక్షించారు. హైదరాబాద్ చీఫ్ కన్జర్వేటర్ ఎంజే అక్బర్, డీఎఫ్ఓ జోజి ఏర్పాట్లను పర్యవేక్షించారు.
