తెలుగు రాష్ట్రాల నీటి సమస్యలను పరిష్కరించేందుకు కేంద్రం ప్రయత్నిస్తుంటే సీఎం కేసీఆర్ సహకరించడం లేదని భాజపా రాష్ట్ర అధ్యక్షుడు బండి సంజయ్ ఆరోపించారు. నీటి వాటాల పంపిణీలో కేసీఆర్ నిర్లక్ష్యం వల్లే తెలంగాణకు అన్యాయం జరుగుతోందన్నారు.
2016లో జరిగిన అపెక్స్ కౌన్సిల్ సమావేశంలో 500 టీఎంసీలకు పైగా నీరు రాష్ట్రానికి రావాల్సి ఉన్నా.. కేసీఆర్ నిర్లక్ష్యంతో కేవలం 200 టీఎంసీల నీళ్లు మాత్రమే వచ్చాయన్నారు. ప్రాజెక్టుల రీడిజైన్ల పేరు చెప్పి.. ఆ కమీషన్లతో జేబులు నింపుకుంటున్నారని ఆరోపించారు. కేసీఆర్-జగన్ లోపాయికార ఒప్పందం చేసుకొని.. తెలుగు రాష్ట్రాలను దోచుకుంటున్నారని ధ్వజమెత్తారు.
ఆగస్టు మొదటి వారంలో పోతిరెడ్డిపాడు టెండర్లను తెరిచేందుకు ఏపీ ముఖ్యమంత్రి జగన్ ప్రయత్నిస్తున్నా.. సీఎం కేసీఆర్లో కనీసం చలనం లేదన్నారు. ఏపీ సీఎం జగన్ సలహాతోనే..అపెక్స్ సమావేశం వాయిదా వేయాలని కేసీఆర్ కోరుతున్నారన్నారు.
విభజన చట్టం ప్రకారమే ఇరు రాష్ట్రాలకు న్యాయం చేయాలని మేము కేంద్రాన్ని కోరుతున్నామని బండి సంజయ్ అన్నారు. ఆగస్టు 5వ తేదీ లోపల ఇరురాష్ట్రాల ముఖ్యమంత్రులు స్పందించకపోతే ఏపీ ప్రభుత్వం తెరిచేందుకు యత్నిస్తున్నా.. టెండర్లను ఆపేందుకు యత్నిస్తామన్నారు. కేంద్రంపై విమర్శలు చేస్తున్న కేసీఆర్.. ఏపీ ముఖ్యమంత్రిపై ఎందుకు ఒక్క మాట మాట్లాడడం లేదని ప్రశ్నించారు. దళితులపై జరుగుతున్న దాడుల వ్యవహారాన్ని దారిమళ్లించేందుకే.. అపెక్స్ కమిటీ సమావేశంపై కేసీఆర్ ప్రకటన చేశారని విమర్శించారు.
ఇవీచూడండి: పోరాడైనా కృష్ణా, గోదావరి జలాలను దక్కించుకుంటాం: కేసీఆర్
