TCS vs TDS : టీడీఎస్ (టాక్స్ డిడక్షన్ ఎట్ సోర్స్), టీసీఎస్ (టాక్స్ కలెక్డెడ్ ఎట్ సోర్స్).. ఈ రెండు కూడా పన్నుకు సంబంధించిన అంశాలే. అయితే పన్ను సేకరణ పక్రియలో ఇవి వేరు వేరు పాత్రలు పోషిస్తాయి. వీటి ద్వారా వసూలైన మొత్తం ప్రభుత్వ ఖాతాలో జమ అవుతుంది. ఇంతకీ టీడీఎస్, టీసీఎస్ అంటే ఏమిటి? వాటి మధ్య ఉన్న భేదాలు ఏమిటి? అనే విషయాల గురించి ఇప్పుడు తెలుసుకుందాం.
టీడీఎస్ అంటే ఏమిటి?
What Is TDS : కంపెనీ ఒక వ్యక్తికి చేసిన చెల్లింపులపై విధించే పన్నును టీడీఎస్ అంటారు. జీతాలు, అద్దె చెల్లింపులు, బ్రోకరేజీ, కమీషన్, ప్రొఫెషనల్ ఫీజు లాంటి చెల్లింపులపై ఈ టీడీఎస్ వర్తిస్తుంది. నిర్ణీత మొత్తం కంటే ఎక్కువ చెల్లింపులు జరిపినప్పుడు ఈ టీడీఎస్ వర్తిస్తుంది.
టీసీఎస్ అంటే ఏమిటి?
What Is TCS : కొనుగోలుదారుడికి ఏదైనా వస్తువును అమ్మేటప్పుడు.. అమ్మకందారు వసూలు చేసే పన్నును టీసీఎస్ అంటారు. కలప, స్క్రాప్ లాంటి వస్తువుల అమ్మకాలపై ఈ టీసీఎస్ వర్తిస్తుంది. తయారీ సామగ్రి మినహాయించి ఇతర వస్తువుల అమ్మకాలపై టీసీఎస్ వర్తిస్తుంది.
టీడీఎస్, టీసీఎస్ మధ్య తేడాల గురించి తెలుసుకుందాం.
1. ఎవరు పన్నును డిడక్ట్/ కలెక్ట్ చేస్తారు
టీడీఎస్ : చెల్లింపులు చేసేవారు (యజమాని, కొనుగోలుదారుడు, కాంట్రాక్టర్)
టీసీఎస్ : ఆదాయాన్ని స్వీకరించేవారు(అమ్మకందారుడు, సర్వీస్ ప్రొవైడర్)
2. ఎప్పుడు పన్నును డిడక్ట్/ కలెక్ట్ చేస్తారు
టీడీఎస్ : చెల్లింపులు జరిపేటప్పుడు
టీసీఎస్ : చెల్లింపులు స్వీకరించినప్పుడు, అమ్మకాలు జరిపినప్పుడు
3. ఏ రకమైన ఆదాయంపై పన్ను డిడక్ట్/కలెక్ట్ అవుతుంది.
టీడీఎస్ : వివిధ మార్గాల ద్వారా వచ్చే ఆదాయంపై (జీతాలు, అద్దె, ప్రొఫెషనల్ ఫీజు, బ్రోకరేజ్, కమీషన్)
టీఎసీఎస్ : నిర్దిష్టమైన వస్తుసేవలపై (కలప, తుక్కు, ఖనిజ ధాతువులు)
4. టాక్స్ ఎందుకు విధిస్తారు?
టీడీఎస్ : పన్ను ఎగవేతను నివారించేందుకు, టాక్స్ను ముందుగానే చెల్లించేలా చూసేందుకు
టీసీఎస్ : పన్ను వసూలును సరళతరం చేసేందుకు
ఆదాయ పన్ను రిఫండ్ రావాలంటే ఏం చేయాలి?
Income tax refund claim procedure : వ్యక్తులు తాము ఆర్జించిన ఆదాయం, ఇతర ఆర్థిక అంశాల ఆధారంగా, సరైన ఐటీఆర్ ఫారాన్ని ఎంచుకొని, రిటర్నులు దాఖలు చేయాల్సి ఉంటుంది. మీరు కచ్చితంగా రిఫండ్ రావాలని ఆశిస్తూ ఉంటే.. ముందుగా ఫారం 26ఏఎస్, వార్షిక సమాచార నివేదిక (ఏఐఎస్)లను జాగ్రత్తగా పరిశీలించండి. ఇందులో మీ ఆదాయ వివరాలతోపాటు, చెల్లించిన టీడీఎస్, టీసీఎస్ లాంటి వివరాలు ఉంటాయి. వాస్తవానికి కొన్ని సార్లు మీ దగ్గర వసూలు చేసిన పన్ను వివరాలు.. ఆదాయపన్ను శాఖకు జమ కాకపోవచ్చు. ఇలాంటి సందర్భాల్లో ఫారం 26ఏఎస్లో కూడా అది కనిపించదు.
పన్ను వర్తించే ఆదాయం రూ.5 లక్షల లోపు ఉంటే, ఆదాయ పన్ను చట్టం సెక్షన్ 87ఏ కింద రూ.12,500 వరకు పన్ను రిబేటు లభిస్తుంది. చాలా మందికి సంబంధించి ఫారం 26ఏఎస్లో ఇది కనిపించే అవకాశం ఉంది.
ఆదాయ పన్ను రిటర్నులు దాఖలు చేయడం ఎలా?
ITR Filing : ఆదాయ పన్ను రిటర్నులను గడువుకు ముందే దాఖలు చేయాలి. లేదంటే అపరాధ రుసుము చెల్లించాల్సి ఉంటుంది. గడువు కంటే ముందు రిటర్నులు దాఖలు చేస్తే, ప్రాసెసింగ్ వేగంగా పూర్తయ్యి, రిఫండ్ కూడా త్వరగా వచ్చే అవకాశం ఉంటుంది.
ITR Filing New or Old Tax Regime : ఇన్కం టాక్స్ రిటర్నులు.. పాత, కొత్త విధానాల్లో సమర్పించడానికి అవకాశం ఉంటుంది. మీకు ఎందులో రిఫండ్ ఎక్కువ వస్తుందో చూసుకొని, దానిని ఫాలో కావడం మంచిది. అయితే అన్ని సెక్షన్ల కింద మినహాయింపులు క్లెయిం చేసుకోలేనివారు, కొత్త పన్ను విధానాన్ని ఎంచుకుంటే ప్రయోజనకరంగా ఉంటుంది.
ITR Filing form 16 : ఫారం-16లో లేని మినహాయింపులను మీరు క్లెయిం చేసుకోవాలని అనుకుంటే, దానికి తగిన ఆధారాలను కచ్చితంగా చూపించాల్సి ఉంటుంది. ముఖ్యంగా సెక్షన్ 80సీ పెట్టుబడుల విషయంలో చాలా జాగ్రత్తగా ఉండాలి. ఆ వివరాలు అన్నీ మీ పాన్, ఆధార్తో అనుసంధానమైన ఉన్న కేవైసీలో ఉంటాయి.
ఉదాహరణకు మీరు ఆరోగ్య బీమా పాలసీకి చెల్లించిన ప్రీమియం గురించి.. మీ పాన్ ఆధారంగా ఆదాయ పన్ను విభాగానికి తెలిసిపోతుంది. అందువల్ల అనుమతించిన మినహాయింపులను క్లెయిం చేసుకున్న తరువాత వాస్తవంగా ఎంత రిఫండ్ వస్తుందో చూసుకోండి. అంతకు మించి క్లెయిం చేసుకోవడానికి ప్రయత్నిస్తే.. ఇబ్బందులకు గురికావల్సి వస్తుందని గుర్తించుకోండి.
