PAN Aadhaar Linking : మీరు ఇంకా మీ పాన్-ఆధార్ అనుసంధానం చేసుకోలేదా? అయితే తొందరపడండి. ఈ జూన్ 30లోపు మీ ఆధార్తో పాన్ను లింక్ చేసుకోండి. ఒక వేళ మీరు ఈ రెండింటిని లింక్ చేసుకోకపోతే.. జులై 1 నుంచి మీ పాన్ డీయాక్టివేట్ అవుతుంది. అంటే ఇక మీ పాన్ పనిచేయదు.
రూ.1000 ఆలస్య రుసుము
మీరు ఇన్కం టాక్స్ ఈ-ఫైలింగ్ వెబ్సైట్లో మీ ఆధార్తో పాన్ను అనుసంధానం చేసుకోవచ్చు. అయితే ఆలస్య రుసుము కింద రూ.1000 చెల్లించాల్సి ఉంటుంది. ఒక వేళ జూన్ 30లోపు మీరు ఈ పనిచేయనట్లయితే.. తరువాతి నెలలో కూడా రూ.1000 అపరాధ రుసుము చెల్లించి ఆధార్-పాన్ లింకింగ్ చేసుకోవచ్చు.
సమస్యలు వస్తాయి!
- పాన్-ఆధార్ లింక్ చేయకపోతే.. ఆదాయపు పన్ను రిటర్నులు దాఖలు చేయడానికి, సెబీ నిబంధనల ప్రకారం మ్యూచువల్ ఫండ్స్, స్టాక్స్లో పెట్టుబడులు పెట్టడానికి కూడా ఆటంకం ఏర్పడుతుంది.
- పాన్-ఆధార్లను అనుసంధానం చేయకపోతే.. మీరు అదనంగా కట్టిన ఇన్కం టాక్స్కు రిఫండ్ కూడా రాదు. అంతే కాదు ఈ రిఫండ్పై వచ్చే వడ్డీని కూడా మీకు అందివ్వరు.
- మీరు చెల్లించాల్సిన టీడీఎస్, టీసీఎస్లపై ఎక్కువ వడ్డీ చెల్లించాల్సి వస్తుంది.
- చెల్లుబాటులేని పాన్తో మీరు బ్యాంకు అకౌంట్, డీమ్యాట్ ఖాతాలను తెరవడానికి వీలుపడదు.
- ఒక వేళ ఇప్పటికే మీకు డీమ్యాట్ ఖాతా ఉన్నప్పటికీ షేర్లలో మదుపు చేయడం సాధ్యం కాదు.
- ఆదాయపు పన్ను చట్టం 1961 ప్రకారం చట్టపరమైన చర్యలకు కూడా బాధ్యులు అవుతారు. ముఖ్యంగా కేవైసీ నిబంధనలు పాటించకపోవడం వల్ల మీ పెట్టుబడి లావాదేవీలపై సెబీ పరిమితులు కూడా విధించే అవకాశం ఉంటుంది.
ఆధార్-పాన్ లింకింగ్ ఎలా చేయాలి?
- ముందుగా మీరు https://www.incometax.gov.in వెబ్సైట్ను ఓపెన్ చేయాలి.
- మీరు ఇప్పటికే ఆధార్-పాన్ లింక్ చేసుకున్నారో? లేదో? స్టేటస్ చెక్ చేసుకోండి.
- ఒక వేళ లింక్ చేసుకోకపోతే పోర్టల్లో లాగిన్ కావాల్సి ఉంటుంది. ఇందుకోసం యూజర్ ఐడీ, పాస్వర్డ్ క్రియేట్ చేసుకోవాలి.
- తరువాత లింక్ ఆధార్ స్టేటస్పై క్లిక్ చేయాలి.
- తరువాత ఈ-ఫైల్ > ఈ-పే టాక్స్ > న్యూ పేమెంట్ క్లిక్ చేయాలి.
- ఇన్కం టాక్స్ ట్యాబ్పై క్లిక్ చేసి, 2024-25 అసెస్మెంట్ ఇయర్ను సెలెక్ట్ చేసుకోవాలి.
- తరువాత 'అదర్ రెసిపెంట్స్ (500)'పై క్లిక్ చేయాలి. అప్పుడు మీకు ముందుగా ఫిల్ చేసిన రూ.1000 కనిపిస్తుంది. దానిని క్లిక్ చేసి, పేమెంట్ను ఆన్లైన్లో కట్టేయాలి. తరువాత చలాన్ను డౌన్లోడ్ చేసుకోవాలి.
- ఆ తరువాత 'లింక్ ఆధార్'పై క్లిక్ చేసి, తరువాత పాన్, ఆధార్ వివరాలు అందులో నమోదు చేయాలి. ఈ విధంగా మీరు పాన్-ఆధార్లను అనుసంధానం చేసుకోవాలి.
ఇక ఆలస్యం చేయవద్దు!
గతంలో ఆధార్-పాన్ అనుసంధానానికి 2023 మార్చి 31 వరకు గడువు ఇచ్చారు. తరువాత జూన్ 30 వరకు ఈ గడువును పొడిగించారు. కానీ ఇకపై మీరు ఆలస్యం చేయకపోవడం మంచిది.
వీరికి మినహాయింపు ఉంది!
కొన్ని నిర్దిష్ట రాష్ట్రాల్లో నివసించే ప్రజలకు, నాన్ రెసిడెంట్స్కు, భారతీయ పౌరులు కానివారికి, 2022 నాటికి ఎనభై సంవత్సరాలు పైబడిన వ్యక్తులకు మాత్రం పాన్-ఆధార్ అనుసంధానం నుంచి మినహాయింపు ఇచ్చారు.
