మహారాష్ట్ర రాజధాని ముంబయిలోని ఓ ట్రిప్లెక్స్ హౌస్.. ఏకంగా రూ.252 కోట్లకు అమ్ముడుపోయింది. ప్రముఖ పారిశ్రామికవేత్త, బజాజ్ ఆటో ఛైర్మన్, బజాజ్ గ్రూప్ ప్రమోటర్-డైరెక్టర్ అయిన నీరజ్ బజాజ్.. ఈ ట్రిప్లెక్స్ హౌస్ కొనుగోలు చేశారు. 18000 చదరపు అడుగుల విస్తీర్ణంలో ఉన్న విలాసవంతమైన నివాసం.. దక్షిణ ముంబయిలోని వాల్కేశ్వర్లో ఇంకా నిర్మాణంలోనే ఉండటం గమనార్హం.
రియల్ ఎస్టేట్ మార్కెట్ వర్గాల ప్రకారం నీరజ్ బజాజ్, మాక్రోటెక్ డెవలపర్లు(లోధా గ్రూప్) మధ్య ఈ డీల్ జరిగింది. ఇప్పటి వరకు ఇదే అత్యంత ఖరీదైన డీల్గా మార్కెట్ వర్గాలు చెబుతున్నాయి. రాజ్భవన్కు దగ్గర్లోని వాల్కేశ్వర్లో.. లోధా మలబార్ టవర్ నిర్మాణం జరుగుతోంది. పారిశ్రామికవేత్త బజాజ్.. ఈ అపార్ట్మెంట్లో మూడు ఫ్లోర్లు బుక్ చేసుకున్నారు. అందుకు సంబంధించిన టోకెన్ అమౌంట్ సైతం చెల్లించారు. ఒక చదరపు మీటర్కు రూ.1.4 లక్షలకు చొప్పున.. మొత్తం రూ.252 కోట్లకు ఈ డీల్ కుదిరింది. భవనానికి బీఎమ్సీ నుంచి ఆక్యుపేషన్ సర్టిఫికేట్ పొందిన తర్వాత మిగతా సొమ్ము.. చెల్లించే విధంగా వీరి మధ్య ఒప్పందం జరిగింది.
మొత్తం 31 అంతస్తులతో ఈ భవన నిర్మాణం జరుగుతోంది. 2026 జూన్ నాటికి ఈ నిర్మాణం పూర్తవుతుందని నిర్వహకులు చెబుతున్నారు. ఈ టవర్లో బజాజ్.. 29, 30, 31వ ఫ్లోర్లను కొనుగోలు చేశారు. ఇందులో ఎనిమిది కార్లకు సరిపడా పార్కింగ్ స్థలం కూడా ఉంటుంది. అదే విధంగా స్విమ్మింగ్ పూల్‌ కూడా ఈ ట్రిప్లెక్స్ హౌస్లో ఉంటుంది. ప్రైవేట్ రూఫ్‌టాప్ టెర్రస్ సైతం అందుబాటులో ఉంటుందని నిర్వహకులు చెబుతున్నారు.
యూనిక్ భవనంలో ప్రస్తుతం నీరజ్ బజాజ్ నివాసం..
ప్రస్తుతం బజాజ్ తన కుటుంబంతో కలిసి పెద్దర్ రోడ్‌లోని మౌంట్ యూనిక్ భవనంలో నివాసం ఉంటున్నారు. గత కొన్నేళ్లుగా జజాజ్.. ఈ భవనంలోని పై రెండు అంతస్తుల్లో నివాసం ఉంటున్నారు. ఈ భవనం 50 ఏళ్లకు పైగా పాతది. లగ్జరీ టవర్లు అందించే సౌకర్యాలు ఈ భవనంలో లేవు.
నెల రోజుల్లోనే మరో కొత్త రికార్డ్..
గత నెలలో వర్లీ లగ్జరీ టవర్‌లోని 30,000 చదరపు అడుగుల పెంట్‌హౌస్‌.. రూ.240 కోట్లకు అమ్ముడుపోయింది. ప్రముఖ పారిశ్రామికవేత్త, వెల్‌స్పన్ గ్రూప్ చైర్మన్.. బికె గోయెంకాకు ఈ భవనాన్ని కొనుగోలు చేశారు. ఇది దేశంలోనే అతిపెద్ద ఖరీదైన డీల్గా ప్రచారం జరిగింది. ఇది జరిగిన నెలరోజుల్లోనే బజాజ్-లోధా గ్రూప్ మధ్య జరిగిన డీల్.. మరో కొత్త రికార్డ్ను సృష్టించింది.
మార్చి నెలలో భారీగా విలాస భవనాల కొనుగోలు..
ఏప్రిల్ 1 నుంచి కొత్త బడ్జెట్ అమలుతో మూలధన లాభాలపై పన్నుకు సంబంధించి కొత్త నిబంధనలు అమలులోకి రానున్నాయి. దీని ప్రకారం ఏప్రిల్ 1 తరువాత రూ.10 కోట్లు పైబడిన మూలధన లాభాలను తిరిగి పెట్టుబడి పెట్టినా ప్రభుత్వం పన్నులు విధించనుంది. ఇప్పటికైతే ఈ నిబంధన అమలులో లేదు. కనుక మార్చి నెలలో భారీ స్థాయిలో లగ్జరీ నివాస భవనాలు అమ్ముడుపోతున్నాయి.
