చైనీస్‌ ఇ-కామర్స్ దిగ్గజం అలీబాబా గ్రూప్ సహ వ్యవస్థాపకుడు, కంపెనీ ఛైర్మన్‌ 'జాక్ మా'కు గురుగ్రామ్ కోర్టు సమన్లు జారీ చేసింది. తప్పుడు కారణాలతో తనను ఉద్యోగం నుంచి తొలగించారని అలీబాబా గ్రూప్ సంస్థ భారతీయ మాజీ ఉద్యోగి చేసిన ఫిర్యాదు మేరకు సమన్లు పంపింది కోర్టు.
ఫిర్యాదు ఇదీ..
కంపెనీ యాప్లైన యూసీ న్యూస్, యూసీ బ్రౌజర్ల సెన్సార్షిప్, ఫేక్ న్యూస్ల విషయంపై తాను అభ్యంతరం వ్యక్తం చేయడం వల్లే.. తనను కంపెనీ నుంచి తప్పించినట్లు సంస్థ మాజీ ఉద్యోగి పుష్పేంద్ర సింగ్ పర్మార్ ఫిర్యాదులో పేర్కొన్నారు.
చైనాకు ప్రతికూలంగా వచ్చే వార్తలను యూసీ వెబ్ సెన్సార్ చేసేదని, వాటిని రాజకీయ గందరగోళానికి కారణమయ్యేలా చూపించేదని ఫిర్యాదులో తెలిపారు పర్మార్. వాటి గురించి తాను ప్రశ్నించడం వల్లే ఉద్యోగం నుంచి తొలగించారని ఆరోపించారు.
సరిహద్దుల్లో ఉద్రిక్తతల నేపథ్యంలో 57 చైనా యాప్లపై.. గత నెల నిషేధం విధించింది భారత్. ఇందులో యూసీ బ్రౌజర్, యూసీ న్యూస్ కూడా ఉన్నాయి. చైనా యాప్లపై నిషేధం విధించిన కొన్ని వారాల్లోనే ఈ విషయం బయటకు రావడం గమనార్హం.
జాక్ మా సహా 12 మంది సంస్థ ఉన్నతాధికారులు.. జులై 29న తమ ఎదుట హాజరుకావాలని కోర్టు ఆదేశించింది. 30 రోజుల్లో లిఖిత పూర్వక వివరణ ఇవ్వాలని తెలిపింది. జాక్ మా తరఫున స్పందించేందుకు అలీబాబా గ్రూప్ నిరాకరించింది. కంపెనీ భారత విభాగం మాత్రం ఉద్యోగుల సంక్షేమానికి తాము కట్టుబడి ఉన్నామని, స్థానిక నిబంధనలను పాటిస్తున్నామని పేర్కొంది.
పుష్పేంద్ర సింగ్ డిమాండ్..
పుష్పేంద్ర సింగ్ పర్మార్ యూసీ వెబ్ విభాగంలో ఆసోసియేట్ డైరెక్టర్గా పని చేశారు. 2017 అక్టోబర్ 17 వరకు ఆ పదనిలో ఉన్నారు పర్మాన్. తప్పుడు కారణాలతో తనను బాధ్యతల నుంచి తప్పించినందుకు కంపెనీ తనకు రూ.2 కోట్ల వరకు నష్టపరిహారం చెల్లించాలని పుష్పేంద్ర సింగ్ డిమాండ్ చేస్తున్నట్లు తెలిసింది.
ఇదీ చూడండి:అంకురం... దిశ మారింది, దశ తిరిగింది!
