దేశవ్యాప్తంగా లాక్డౌన్ సడలింపులతో వాహనాల విక్రయాలు పెరుగుతాయా? అంటే అవుననే సమధానాలు వినిపిస్తున్నాయి. ప్రముఖ రీసెర్చ్ సంస్థ డొలాట్ క్యాపిటల్ నివేదికలోనూ ఇదే విషయం వెల్లడైంది. జూలైలో విక్రయాలు భారీగా పుంజుకోవచ్చని తెలిసింది.
సర్వేలోని మఖ్యాంశాలు..
- ప్యాసింజర్ వాహనాలు, ద్విచక్ర వాహనాలకు సంబంధించి ఎంక్వైరీలు భారీగా జరుగుతున్నాయి. ఆ సెగ్మెంట్లో విక్రయాలు పెరుగుతాయనేందుకు ఇది సానుకూల సంకేతం.
- టైర్ 2, 3 పట్టణాల్లో లాక్డౌన్ సడలింపుల కారణంగా వ్యక్తిగత వాహనాలకు ప్రాధాన్యం పెరుగుతోంది. కరోనా నేపథ్యంలో వ్యక్తిగత భద్రతపై దృష్టి సారించడం ఇందుకు ముఖ్య కారణం.
- పెళ్లిళ్ల సిజన్తో జులైలో వాహన విక్రయాలు మరింత పెరిగే అవకాశం ఉంది.
- గ్రామీణ ప్రాంతాల్లో పెరుగుతున్న డిమాండ్ వాహన రంగ వ్యాపారాలు కూడా పుంజుకునే అవకాశాలున్నాయి. ఉత్పత్తి పెంపు, మార్కెట్లోకి పెరిగిన సరఫరా వంటి పరిణామాలు ఇందుకు ఊతమందించే వీలుంది.
- ద్విచక్రవాహనాల విక్రయాలు స్థిరంగా కొనసాగుతున్నప్పటికీ.. ప్యాసింజర్ వాహనాల డిమాండ్ రికవరీ అస్పష్టంగా ఉంది. ద్విచక్రవాహనాల విక్రయాలు రానున్న రోజుల్లో ఇంకా పెరిగే వీలుంది.
- కరోనా కారణంగా తగ్గిన ఆదాయంతో రీప్లేస్మెంట్, అప్గ్రేడ్ కొనుగోళ్లు 50 శాతం వరకు ప్రభావితం కావచ్చు.
- వర్షాకాలం సాధారణంగానే ఉంటుందన్న అంచనాలతో.. ట్రాక్టర్ల మార్కెట్ వేగంగా రికవరీ సాధించే వీలుంది. వ్యవసాయంపై ప్రభుత్వం ఎక్కువ దృష్టిసారించడం కూడా ఇందుకు కారణమే.
- డిమాండు లేక 50 శాతం వాణిజ్య వాహనాలు ఖాళీగా ఉంటున్నాయి. మిగతా 50 శాతం వాహనాల మధ్య తీవ్రమైన పోటీ నెలకొంది. దీనితో వాణిజ్య వాహనాల కొనుగోళ్లు అంతగా ఉండకపోవచ్చు.
- 6 నెలల వరకు ఈఎంఐలపై మారటోరియం విధిస్తూ ఆర్బీఐ తీసుకున్న చర్య మాత్రమే వాణిజ్య వాహనదారులకు ఊరట కలిగించే విషయమని సర్వే పేర్కొంది. అయితే ప్రస్తుత పరిస్థితుల నేపథ్యంలో వాణిజ్య వాహనాల కొనుగోళ్లకు ఇచ్చిన రుణాలు మొండిబకాయిలుగా మారొచ్చని బ్యాంకులు, రుణ సంస్థలు ఆందోళన చెందుతున్నాయి.
- త్రిచక్ర వాహనాల (ఆటోలు) విక్రయాలు మాత్రం ఇప్పట్లో పుంజుకునే అవకాశం లేదని నివేదిక అభిప్రాయపడింది. ముఖ్యంగా లాక్డౌన్లో ఆటో డ్రైవర్ల ఆదాయం భారీగా పడిపోయింది. మరోవైపు 70-80 శాతం మంది ఈఎంఐ మారటోరియంను ఎంచుకున్నారు. ఇలాంటి పరిస్థితుల్లో కొత్తగా ఆటోల కొనుగోలుకు రుణాలు ఇచ్చేందుకు ఫినాన్షియర్లు సుముఖత చూపడం లేదని వేర్కొంది.
ఇదీ చూడండి :బ్యాంకింగ్ రంగ సంస్కరణలకు 'ఆర్డినెన్స్' రూపం
