ఇజ్రాయెల్లో తయారైన ఒక స్పైవేర్.. ప్రపంచవ్యాప్తంగా లక్ష్యంగా చేసుకొన్న 1400 మందిలో భారతీయ జర్నలిస్టులు, మానవహక్కుల కార్యకర్తలు ఉన్నట్లు సామాజిక మాధ్యమం వాట్సాప్ వెల్లడించింది. ఇజ్రాయెల్కు చెందిన ఎన్ఎస్ఓ గ్రూప్ తయారు చేసిన సాఫ్ట్వేర్ దీనికి కారణమని తెలిపింది. ఆ గ్రూప్పై కాలిఫోర్నియా ఫెడరల్‌ కోర్టులో కేసు దాఖలు చేసినట్లు పేర్కొంది.
ఏప్రిల్‌-మే నెలల్లో జరిగిన సైబర్‌ దాడుల వెనుక ఇజ్రాయెల్ ఎన్ఎస్ఓ సంస్థ హస్తం ఉందని వాట్సాప్ ఆరోపిస్తోంది. ఈ సంస్థ కనీసం 100 మంది పౌరులను లక్ష్యంగా చేసుకున్నట్లు.. వాట్సాప్ ప్రతినిధులు వెల్లడించారు. ఇదేమీ పొరపాటున జరిగిన తప్పు కాదన్న వాట్సాప్.. భారతీయ జర్నలిస్టులు, మానవహక్కుల కార్యకర్తలే వీరి లక్ష్యమని తెలిపింది. ఐతే వీరి వివరాలు, సంఖ్యను చెప్పేందుకు నిరాకరించింది.
40 కోట్ల మంది వినియోగం..
భారత్‌లో 40 కోట్ల మంది వాట్సాప్ వినియోగిస్తుండగా.. ఈ యాప్‌లో లొసుగులను ఆధారంగా చేసుకొని రిమోట్‌ పద్ధతుల్లో ఫోన్లలో నిఘా సాఫ్ట్‌వేర్‌ను హ్యాకర్లు ఇన్‌స్టాల్‌ చేస్తున్నారు. మేలో ఈ సైబర్‌ దాడులను గుర్తించిన వాట్సాప్ వెంటనే స్పందించింది. యాప్‌లో ఉన్న లోపాలను సరిచేసి సరికొత్త భద్రతా ఏర్పాట్లతో అప్‌డేట్‌ను ఇచ్చింది. మరోవైపు వాట్సాప్ ఆరోపణలను ఖండించిన ఎన్ఎస్ఓ గ్రూప్.. దీనిపై న్యాయపోరాటం చేస్తామని వెల్లడించింది.
వచ్చే నెల 4లోపు వివరణకు ఆదేశం..
భారతీయ జర్నలిస్టులు, మానవహక్కుల కార్యకర్తలు లక్ష్యంగా చేసుకున్న స్పైవేర్ అంశంపై పూర్తి స్థాయి స్పందన తెలియజేయాలని వాట్సాప్ను ఆదేశించింది భారత సమాచార, సాంకేతిక మంత్రిత్వ శాఖ. నవంబర్ 4 లోపు నివేదిక సమర్పించాలని కోరింది.
ఇదీ చూడండి: ట్విట్టర్లో ఇకపై రాజకీయ ప్రకటనలు నిషేధం
