సాధారణంగా దొంగలు చిన్న చిన్న వస్తువులు చోరీ చేస్తారు. గజ దొంగలైతే కార్లు, బైకులు, ఏటీఎం మెషీన్లు దొంగిలిస్తారు. కానీ ఇప్పుడు ఆ పరిస్థితి మారింది. ఐరన్ బ్రిడ్జి దగ్గరి నుంచి రైలు ఇంజిన్ వరకు.. రోడ్డు రోలర్ నుంచి సెల్ టవర్ వరకు దేన్నైనా సూనాయాసంగా చోరీ చేస్తున్నారు. తాజాగా అంతకుమించిన మరో ఓ విచిత్ర ఘటన వెలుగులోకి వచ్చింది. అందేంటంటే..
ఉత్తర్ప్రదేశ్ జరిగిన ఈ విచిత్ర ఘటన అందరినీ ఆశ్చర్యానికి గురిచేస్తోంది. రోడ్డును ఎత్తుకెళ్లారు దొంగలు. వినడానికి వింతగా ఉన్నా.. ఇది నిజం. ఈ ఘటన షాజహాన్పుర్ జిల్లాలో వెలుగుచూసింది. ఇంకా విచిత్రం ఏంటంటే.. రాష్ట్ర పీడబ్ల్యూడీ శాఖ మంత్రి సొంత జిల్లాలోనే, ఆ శాఖ నిర్మించిన రోడ్డునే చోరీ చేశారు.
ఇంతకీ ఏం జరిగిందంటే..
షాజహాన్పుర్ జిల్లాలోని సుజావల్పుర్ నుంచి పరశురామ్పురి వరకు 3 కిలో మీటర్ల రోడ్డును రాష్ట్ర పీడబ్ల్యూడీ (పబ్లిక్ వర్క్స్ డిపార్ట్మెంట్) నిర్మిస్తోంది. అందులో భాగంగా భూమిని చదును చేసి.. ముందు కంకర వేశారు. తారు వేస్తే రోడ్డు పని పూర్తైపోతుంది. కానీ ఇంతలోనే ఈ రోడ్డుపై దొంగలు కన్నేశారు. రోడ్డుపై ఉన్న కంకరను దొంగిలించాలని ప్లాన్ చేశారు. మార్చి 16న రాత్రి 3 గంటల సమయంలో జేసీబీ సహాయంతో దాదాపు 250 మీటర్ల పొడవునా కంకర ట్రాక్టర్ ట్రాలీల్లో నింపారు. ఇది గమనించిన గ్రామస్థులు నిలదీయగా.. తాను రోడ్డు కాంట్రాక్టర్నని నమ్మబలికాడో దుండగుడు. అనంతరం కంకర నింపిన ట్రాక్టర్లతో పరారయ్యాడు. కాగా, దొంగిలించిన కంకర విలువ రూ. 5 లక్షలకు పైగా ఉంటుందని పీడబ్ల్యూడీ అధికారులు తెలిపారు. ఈ ఘటనపై ఆ రోడ్డు కాంట్రాక్టర్ పోలీసులకు ఫిర్యాదు చేశాడు. కానీ పోలీసులు కేసు నమోదు చేయలేదు. ఈ ఘటనపై పబ్లిక్ వర్క్స్ డిపార్ట్మెంట్ సూపరింటెండెంట్ ఇంజినీర్ స్పందిచారు. ఈ విషయంపై పీడబ్ల్యూడీ ఉన్నతాధికారులు దర్యాప్తు చేస్తున్నారని.. నిందితులపై చట్టరీత్యా చర్యలు తీసుకుంటామని తెలిపారు.
సెల్ఫోన్ టవర్ చోరీ..
ఎన్ని చర్యలు తీసుకున్నా దోపిడీలకు అడ్డుకట్ట పడటం లేదు. ఐరన్ బ్రిడ్జి, రైలు ఇంజన్‌ లాంటి వాటిని కూడా దొంగలిస్తున్న కేటుగాళ్లు.. సెల్ఫోన్ టవర్లను సైతం చోరీ చేశారు. జనవరిలో జరిగిన ఈ దొంగతనాన్ని చూసి పోలీసులే షాక్కు గురయ్యారు. ఈ వింత చోరీ సబ్జీబాగ్ ప్రాంతంలో వెలుగు చూసింది. కాగా, చోరీకి గురైన సెల్ టవర్ విలువ రూ.8.32 లక్షలు ఉంటుందని తెలిసింది. బిహార్లోని పట్నాలో సెల్ఫోన్ టవర్ దొంగతనం జరగడం ఇదేం మొదటి సారి కాదు. ఇంతకుముందు 2022 నవంబర్లో రూ.19 లక్షల విలువైన టవర్ను చోరీ చేశారు. ఈ చోరీ ఎలా జరిగిందో తెలియాలంటే ఇక్కడ క్లిక్ చేయండి.
