వీధి కుక్కలు, పిల్లుల కోసం ఇద్దరు మిత్రుల భిక్షాటన- హింసకు వ్యతిరేకంగా అవగాహన

Two Friends Begging For Stray Dogs And Cats : వీధి కుక్కలు, పిల్లుల కోసం భిక్షాటన చేస్తున్నారు బంగాల్​ కోల్​కతాకు చెందిన ఇద్దరు స్నేహితులు. అలా వచ్చిన డబ్బుతో వివిధ ప్రాంతాల్లోని మూగజీవాలకు ఆహారం, వైద్య సాయం అందిస్తున్నారు. మరి ఆ ఇద్దరి మిత్రుల కథేంటో ఇప్పుడు తెలుసుకుందాం రండి.

Two Friends Begging For Stray Dogs And Cats : వీధుల్లో తిరిగే కుక్కలు, పిల్లుల బాగోగుల కోసం రోడ్డెక్కారు బంగాల్​ కోల్​కతాకు చెందిన ఇద్దరు స్నేహితులు. వాటి తిండి, ఆరోగ్యం సహా ఇతర అవసరాలు తీరేందుకు కావాల్సిన డబ్బు కోసం యాచిస్తున్నారు. అలా వచ్చిన సాయాన్ని వాటి యోగక్షేమాల కోసం వినియోగిస్తున్నారు.

మధురీతు దే, అనురభ్​ రాయ్- ఇద్దరు స్నేహితులు. అనురభ్​ రాయ్ డిగ్రీ పూర్తి చేసి పలు ఐటీ కంపెనీల్లో పనిచేసి మానేశారు. మధురీతు దే కూడా కోల్‌కతాలోని ఒక ప్రముఖ పబ్లిషింగ్ హౌస్‌లో 6 సంవత్సరాల పాటు విధులు నిర్వర్తించి ఉద్యోగాన్ని వదిలేశారు. వీరిద్దరికీ టూరిజం రంగం అంటే ఎంతో ఇష్టం. ఇందులో భాగంగానే కొన్నాళ్ల తర్వాత ఇద్దరు కలిసి ఓ ట్రావెల్​ ఏజెన్సీని ప్రారంభించారు. ప్రస్తుతం ఇద్దరూ కలిసి దానిని నిర్వహిస్తున్నారు. అలా పర్యాటకంపై ప్రేమతో అప్పుడప్పుడు అడవుల్లో, కొండ మార్గాల్లో బైక్​ రైడ్​లకూ వెళ్తుంటారు.

వీధి కుక్కలకు, పిల్లుల కోసం రోడ్లపై మధురీతు దే, అనురభ్​ రాయ్

ప్లకార్డు, డొనేషన్​ బాక్స్​తో రోడ్లపైకి
ఇదిలాఉంటే ఈ ఇద్దరు మిత్రులకు మూగజీవాలంటే ప్రాణం. ఈ కారణంతోనే వాటికోసం ఏదైనా చేయాలనే ఆలోచనతో ఓ మంచి పనికి శ్రీకారం చుట్టారు. అదే- వీధి కుక్కలు, పిల్లుల సంరక్షణ. ఇందులో భాగంగానే వీధుల వెంట, రోడ్లపై తిరిగే కుక్కలు, పిల్లులకు కావాల్సిన ఆహారమే కాకుండా వాటికి అనారోగ్యం తలెత్తితే ఆస్పత్రిలో చూపించేందుకు అవసరమయ్యే నగదును పోగు చేయాలనుకున్నారు. ఇందుకోసం కోల్​కతా నగర రోడ్లపై, కూడళ్లల్లో నిలబడి ప్రజల వద్ద భిక్షాటన చేస్తున్నారు. అలా కొందరు ఇచ్చే ఎంతోకొంత డబ్బుతో వివిధ ప్రాంతాల్లో ఆపదలో ఉన్న అనేక మూగజీవాలను ఆదుకుంటున్నారు. వాటికి సేవ చేసుకుంటున్నారు. తాము యాచించేందుకు గల కారణాలను వివరిస్తూ ఓ ప్ల​కార్డుతో పాటు చిన్నపాటి డొనేషన్​ బాక్స్​ను పట్టుకొని తిరుగుతున్నారు. ఇలా వారంలో కొన్ని రోజులు భిక్షాటన చేస్తున్నారు మధురీతు దే, అనురభ్​ రాయ్.

సాయం అందిస్తున్న ప్రయాణికుడు

సంరక్షణే కాదు
కేవలం వీధి కుక్కలు, పిల్లుల సంరక్షణ బాధ్యతే కాదు, మూగజీవాల పట్ల కొందరు ప్రదర్శిస్తున్న తీరును ఖండిస్తూ ప్రజల్లో అవగాహన కల్పిస్తున్నారు మధురీతు దే, అనురభ్​ రాయ్. ఈ విషయంలో అందరినీ ఒకే తాటిపైకి తెచ్చేందుకు కృషి చేస్తున్నారు. ఇది కూడా జంతువుల పట్ల తమకున్న లక్ష్యాల్లో ఒకటని చెబుతున్నారు ఈ ఫ్రెండ్స్​. మరోవైపు కుక్కల పట్ల ప్రజల్లో ఉన్న భయాన్ని తగ్గించేందుకు ప్రత్యేక అవగాహన కార్యక్రమాన్ని నిర్వహిస్తున్నారు. సర్మేయా అనే పేరుతో సోషల్​ మీడియా వేదికగా క్యాంపెయిన్​ నిర్వహిస్తున్నారు. ఈ కార్యక్రమానికి విశేష స్పందన లభిస్తుండడం వల్ల అనేక ప్రాంతాల నుంచి కుక్కలను రక్షించాలంటూ కాల్స్​ సైతం వస్తున్నాయని చెబుతున్నారు ఈ పెట్​ లవర్స్​.

"మేము చేస్తున్న ఈ మంచి పనిని మరింత విస్తరించడమే మా లక్ష్యం. మా వ్యక్తిగత డబ్బును కూడా వీలైనంతగా ఇందుకోసం వినియోగిస్తున్నాము. కానీ, రోజురోజుకు ఒత్తిడి మరింతగా పెరుగుతోంది. ఇందుకు కారణం మా కార్యక్రమానికి మంచి ఆదరణ వస్తుండడమే. కొందరు ఆహారాన్ని డొనేట్​ చేస్తుంటే మరికొందరు డబ్బు రూపేణా తమ సాయాన్ని అందిస్తున్నారు. మా అంతిమ లక్ష్యం మూగజీవాలను కాపాడటమే. ఈ మధ్య వీటిని(కుక్కల, పిల్లులను) హింసించే శాతం కూడా అధికమైంది. దీనిపై చిన్నపిల్లల నుంచి వృద్ధుల వరకు అందరికీ అవగాహన కల్పిస్తున్నాము."
- మధురీతు దే, అనురభ్​ రాయ్, భిక్షాటన చేస్తున్న స్నేహితులు