Today Road Accident in Anantapur : అనంతపురం జిల్లాలో ఘోర రోడ్డు ప్రమాదం చోటు చేసుకుంది. ఈ ప్రమాదంలో నలుగురు మృతి చెందారు. గార్లదిన్నె మండలం కల్లూరు వద్ద శనివారం వేకువ జామున జాతీయ రహదారి 44పై బియ్యం లోడ్‌తో వెళ్తున్న ట్రాక్టర్‌ను ప్రైవేటు బస్సు ఢీకొట్టడంతో ఈ ఘటన జరిగింది. మృతులు గుత్తి మండలం మామిడూరుకు మృతులు చిన్నతిప్పయ్య(45), శ్రీరాములు(45), నాగార్జున(30), శ్రీనివాసులు(30)గా గుర్తించారు. ఈ ఘటనలో బస్సు డ్రైవర్కు, మరో వ్యక్తికి గాయాలు అయ్యాయి. ఒకరి పరిస్థితి విషమంగా ఉంది. దీంతో అతడిని అనంతపురం ఆసుపత్రికి తరలించారు. కేసు నమోదు చేసుకున్న పోలీసులు దర్యాప్తు చేపట్టారు.
పరిహారం చెల్లించాల్సిందే : మృతదేహాలను శవపరీక్షకు తరలించకుండా బంధువులు, స్థానికులు 44వ నెంబర్ జాతీయ రహదారిపై ఆందోళన చేపట్టారు. ప్రభుత్వం స్పందించి పరిహారం ప్రకటించే వరకు మృతదేహాలను తరలించడానికి వీలు లేదని అన్నారు. దీంతో హైదరాబాదు - బెంగళూరు హైవే పై రెండు వైపులా భారీగా వాహనాలు నిలిచిపోయాయి. గుంతకల్లు వైఎస్సార్సీపీ ఎమ్మెల్యే వెంకటరామిరెడ్డి వచ్చి తమకు న్యాయం చేయాలని మృతుల బంధువులు డిమాండ్ చేశారు. స్థానిక పోలీసులు హామీ ఇవ్వడంతో మృతుల బంధువులు నిరసన విరమించుకున్నారు.
