Sweet basil uses: ఈ ఒక్క ఆకు.. పంచదారతో పోలిస్తే 30 రెట్లు తియ్యగా ఉంటుంది. మధుమేహ రోగులకు ఎంతో సురక్షితం. అదే స్వీట్ తులసి. అద్భుత లక్షణాలు కలిగిన ఈ మొక్క ఇప్పుడు కేరళలో అత్యంత ప్రాచుర్యం పొందింది. కన్నూర్ జిల్లాకు చెందిన ఓ రైతు దీనిని సాగు చేస్తున్నారు. రాష్ట్రం నలుమూలల నుంచి మొక్కల కోసం ఆర్డర్లు వస్తున్నాయంటే.. దాని ప్రాముఖ్యం అర్థం చేసుకోవచ్చు.
జిల్లాలోని పరియారమ్ గ్రామానికి చెందిన కేవీ షాజీ.. కొద్ది రోజుల క్రితం ఈ మొక్కలోని ఔషధ గుణాలను తెలుసుకుని ఆకర్షితుడయ్యారు. దానిని సాగు చేయాలని నిర్ణయించుకున్నారు. త్రివేండ్రం నుంచి కొన్ని మొక్కలను తీసుకొచ్చి.. తన భూమిలో పెంచడం ప్రారంభించారు. రక్తంలోని చక్కెర స్థాయిని, బీపీని నియంత్రించే మంచి గుణాలు ఈ స్వీట్ తులసిలో ఉన్నాయని చెబుతున్నారు షాజీ.
మొక్క నాటిన తర్వాత మూడు నెలలకు పూలు పూస్తాయి. ఆ తర్వాత వాటి ఆకులను తొలగిస్తారు. వాటిని ఎండబెట్టి వాడుకునేందుకు వీలుగా పొడిగా మారుస్తారు. పొడిని నిలువ చేసుకుని నేరుగా అవసరమైన ఆహార పదార్థాల్లో చక్కెర తరహాలో వాడుకోవచ్చు. లేదా.. ఆ పొడిని 5 నుంచి 7 నిమిషాల పాటు మరిగిస్తే.. అందులోని తియ్యదనం నీటిలో కలుస్తుంది. ఆ నీటిని మిఠాయిలు వంటివి చేసేందుకు వినియోగించవచ్చు.
ఒక మొక్క ఐదేళ్ల వరకు పెరుగుతుందని చెబుతున్నారు షాజీ. మూడు మొక్కలను రూ.250కి విక్రయిస్తున్నామని, ప్రస్తుతం కొరియర్ ద్వారా డెలివరీ చేస్తున్నామని చెప్పారు. ఆన్లైన్ డెలివరీ కోసం ప్రణాళికలు రచిస్తున్నట్లు తెలిపారు.
ఇదీ చూడండి: మధుమేహానికి మెంతులతో రక్ష!
