కేంద్ర మాజీ మంత్రి, దివంగత సుష్మా స్వరాజ్ కుమార్తె బాన్సురీ స్వరాజ్ క్రియాశీల రాజకీయాల్లోకి అడుగుపెట్టారు. ఆదివారం దిల్లీ బీజేపీకి చెందిన న్యాయ విభాగానికి కో కన్వీనర్గా నియమితులయ్యారు. రాజకీయాల్లో ఆమెకు ఇది తొలి అడుగుగా విశ్లేషకులు చెబుతున్నారు. బాన్సురీ.. ప్రస్తుతం సుప్రీంకోర్టులో న్యాయవాదిగా పనిచేస్తున్నారు. దిల్లీ బీజేపీ అధ్యక్షుడిగా ఇటీవల నియమితులైన వీరేంద్ర సచ్దేవ.. తన తొలి నియామకాల్లో భాగంగా బాన్సురీని పార్టీ లీగల్ సెల్లోకి చేర్చుకున్నారు.
"గతంలోనూ నేను పార్టీకి న్యాయపరంగా సహాయం చేశా. ఇది కేవలం అధికారికంగా అవకాశం ఇవ్వడం లాంటిది. పార్టీకి సేవ చేసేందుకు వచ్చిన అవకాశం ఇది. దిల్లీ బీజేపీ లీగల్ డిపార్ట్మెంట్ కో-కన్వీనర్గా క్రియాశీలంగా పనిచేసేందుకు ప్రయత్నిస్తూనే ఉంటా. నాకు ఈ అవకాశం ఇచ్చినందుకు ప్రధానమంత్రి నరేంద్ర మోదీ, అమిత్ షా, జేపీ నడ్డా, బీఎల్ సంతోష్, వీరేంద్ర సచ్దేవకు కృతజ్ఞతలు."
-బాన్సురీ స్వరాజ్, దిల్లీ బీజేపీ లీగల్ డిపార్ట్మెంట్ కో- కన్వీనర్, సుప్రీంకోర్టు న్యాయవాది
సుష్మా స్వరాజ్కు ఉన్న ఏకైక సంతానం బాన్సురీ. తండ్రి స్వరాజ్ కౌశల్ బాటలోనే నడిచి క్రిమినల్ లాయర్గా గుర్తింపు తెచ్చుకున్నారు బాన్సురీ స్వరాజ్. న్యాయవాదిగా బాన్సురీకి 16 సంవత్సరాల అనుభవం ఉంది. దిల్లీ బార్ కౌన్సిల్లో ఆమెకు సభ్యత్వం ఉంది. ప్రస్తుతం దిల్లీ హైకోర్టు, సుప్రీంకోర్టులలో కేసులు వాదిస్తున్నారు. ఇంగ్లాండ్లోని యూనివర్సిటీ ఆఫ్ వార్విక్లో ఇంగ్లిష్ లిటరేచర్ అభ్యసించారు. అక్కడి నుంచి బీఏ ఆనర్స్ డిగ్రీ పొందిన తర్వాత.. లండన్లోని బీపీపీ లా స్కూల్లో న్యాయవాద వృత్తిని అభ్యసించారు. 'బారిస్టర్ ఎట్ లా'లో అర్హత సాధించిన బాన్సురీ.. లండన్లోని 'ఇన్ ఆఫ్ ఇన్నర్ టెంపుల్' బార్ అసోసియేషన్లో చేరారు. ఆ తర్వాత యూనివర్సిటీ ఆఫ్ ఆక్స్ఫర్డ్లోని సెయింట్ కేథరిన్స్ కళాశాలలో మాస్టర్స్ చదివారు.
లలిత్ మోదీ వివాదం
బాన్సురీ పలు వివాదాల్లోనూ చిక్కుకున్నారు. ఐపీఎల్ వ్యవస్థాపకుడు లలిత్ మోదీకి పాస్పోర్ట్ తిరిగి ఇప్పించడంలో సాయం చేశారని ఆమెపై విమర్శలు ఉన్నాయి. లలిత్ మోదీకి పాస్పోర్ట్ తిరిగి ఇవ్వాలని దిల్లీ హైకోర్టు 2014 ఆగస్టు 27న ఆదేశాలు జారీ చేసింది. అప్పుడు ఆయన.. తన లీగల్ టీమ్కు ధన్యవాదాలు చెబుతూ ట్వీట్ చేశారు. ఆ ట్వీట్లో ఉన్న ఎనిమిది మంది పేర్లలో బాన్సురీ పేరు సైతం ఉంది. అప్పుడే ఆమె పేరు చర్చనీయాంశమైంది. బాన్సురీపై పలు విమర్శలు వచ్చాయి. ఆ సమయంలోనూ బీజేపీ ఆమెకు అండగా నిలిచింది. బాన్సురీ తన వృత్తిధర్మాన్ని మాత్రమే పాటించారని చెప్పుకొచ్చింది.
