తమిళనాడు తరహాలో భాజపాకు వ్యతిరేకంగా జాతీయ స్థాయిలో ఓ కూటమిని ఏర్పాటు చేయాలని కాంగ్రెస్ అగ్ర నేత రాహుల్ గాంధీని కోరారు డీఎంకే అధినేత స్టాలిన్. తమిళనాడుపై భాజపా.. సాంస్కృతిక, రసాయనిక దాడులకు పాల్పడుతోందని ఆరోపించారు. సాలెంలో ఎన్నికల ప్రచారంలో స్టాలిన్ పాల్గొన్నారు. మతవాద, నియంతృత్వ శక్తులతో దేశం సతమతమవుతోందన్న ఆయన.. ఆ బాధల నుంచి విముక్తి కల్పించేది రాహుల్ మాత్రమేనని కొనియాడారు.
"గత లోక్సభ ఎన్నికల్లో భాజపాకు వ్యతిరేకంగా జాతీయ స్థాయిలో తమిళనాడులో ఉన్నట్లుగా ఎలాంటి కూటమి లేదు. అందుకే.. రాహుల్ గాంధీ ఆ బాధ్యత తీసుకుని జాతీయ స్థాయిలో త్వరగా ఓ కూటమిని ఏర్పాటు చేయాలి. ఏఐడీఎంకే సాయంతో తమిళనాడులో పట్టు సాధించాలని భాజపా ప్రయత్నిస్తోంది. కానీ, అది ఎన్నటికీ జరగదు."
- స్టాలిన్, డీఎంకే అధినేత
తమిళనాడు అసెంబ్లీ ఎన్నికల తర్వాత.. రాష్ట్రం నుంచి భాజపా కనుమరుగవుతుందని స్టాలిన్ విమర్శించారు. తమ నేతృత్వంలోని లౌకికత్వ కూటమి తమిళనాట అధికారం చేపడుతుందని ధీమా వ్యక్తం చేశారు.
ఇదీ చూడండి:'అమిత్ షా-పవార్ల మధ్య భేటీ జరగనేలేదు'
