Road Accident in Uttar Pradesh : ఉత్తరప్రదేశ్‌ బాందా జిల్లాలో జరిగిన ఘోర రోడ్డు ప్రమాదంలో తల్లీకొడుకు సహా ఏడుగురు మృతి చెందారు. వేగంగా వచ్చిన ఓ బొలేరో.. రోడ్డు పక్కన ఆగి ఉన్న ట్రక్కును ఢీకొట్టింది. ఈ ప్రమాదంలో కారులో ప్రయాణిస్తున్న 8 మందిలో ఐదుగురు అక్కడిక్కడే మృతి చెందారు. మరో ఇద్దరు ఆస్పత్రికి తరలిస్తుండగా మార్గమధ్యంలో మరణించగా.. మరో వ్యక్తి ఆస్పత్రిలో చికిత్స పొందుతున్నాడు. కరెంట్ షాక్కు గురైన బాలుడిని ఆస్పత్రికి తరలిస్తుండగా గురువారం రాత్రి ఈ ప్రమాదం జరిగింది.
ఇదీ జరిగింది
తిలౌసా గ్రామానికి చెందిన 15 ఏళ్ల కల్లు కరెంట్ షాక్కు గురయ్యాడు. దీంతో చికిత్స కోసం అతడిని బబేరూలోని ప్రభుత్వ ఆస్పత్రికి వెళ్తున్నారు. బాలుడి తల్లి సహా గ్రామానికి చెందిన మరో ఏడుగురు ఓ బొలేరో కారులో ప్రయాణిస్తున్నారు. ఆస్పత్రికి తొందరగా వెళ్లాలనే ఉద్దేశంతో వేగంగా కారును నడిపాడు డ్రైవర్. ఈక్రమంలోనే పరాయియాదయీ గ్రామ సమీపంలో రోడ్డు పక్కన ఆపిన ఓ ట్రక్కును ఢీ కొట్టారు.
దీనిని గమనించిన స్థానికులు పోలీసులకు సమాచారం అందించారు. అనంతరం హుటాహుటిన స్థలానికి చేరుకున్న పోలీసులు సహాయక చర్యలు చేపట్టారు. కారు నుజ్జునుజ్జు కావడం వల్ల గ్యాస్ కట్టర్ సహాయంతో బొలేరోలో చిక్కుకున్న బాధితులను ఆస్పత్రికి తరలించారు. ఎస్పీ అభినందన్ సహా జిల్లా ఉన్నతాధికారులు ఘటనా స్థలంలోనే ఉండి సహాయక చర్యలను పర్యవేక్షించారు. ఈ ప్రమాదంలో బాలుడు, తల్లి సహా గ్రామానికి చెందిన కైఫ్, జహీల్, షకీర్, ముసాహిద్, డ్రైవర్ మరణించారు. జహీద్ అనే వ్యక్తి తీవ్రగాయాలతో ఆస్పత్రిలో చికిత్స పొందుతున్నాడు.
"తిలౌసాకు చెందిన 8 మంది బాబెరూకు బొలెరోలో వస్తున్నారు. కారు సుమారు 130 కిలోమీటర్ల వేగంతో ఉండడం వల్ల అదుపుతప్పింది. దీంతో పక్కనే ఆగి ఉన్న ట్రక్కును ఢీ కొట్టింది. ఈ ప్రమాదంలో ఏడుగురు మరణించారు. ఒక వ్యక్తి ఆస్పత్రిలో చికిత్స పొందుతున్నారు. అతడి పరిస్థితి విషమంగానే ఉంది."
-- అభినందన్, ఎస్పీ
